الطبيب حمضي لـ”كود”: ماتخليوش وليداتكم يعومو بلا مراقبة.. وها النصائح الضرورية باش تحميوهم من السخونية ولجفاف فالبيسين والبحر .

أميمة عطية كود كازا ///

مع موجة الحرارة القوية اللي ضربات عدد من مناطق المغرب، وجه الدكتور الطيب حمضي، الطبيب والباحث في سياسات وأنظمة الصحة، مجموعة ديال النصائح للوالدين باش يحافظو على صحة وسلامة وليداتهم الصغار في هاد الصيف، خصوصاً فالبحر والبيسين.

وكال حمضي، فتصريح لـ”كود”، إن الدراري الصغار كيبقاو من أكثر الفئات عرضة لمخاطر الحرارة، بحيت أن الجسم ديالهم مازال كيتطور، والقدرة ديالو على تنظيم الحرارة ماشي بحال عند الكبار، الشي لي كيخليهم أكثر عرضة لسالمة، والجفاف، والحروق الناتجة عن التعرض الزايد لأشعة الشمس.

وأكد الطبيب حمضي فهاد السياق، أن أول حاجة خاص الوالدين يردو لها البال هي مراقبة الأطفال بشكل مستمر فالبيسين أو البحر، مشدداً على أنه ماخاصش دري صغير يبقا بوحدو وخا يكون كيعرف يعوم.

وزاد الباحث في قطاع الصحة، أن من بين الإجراءات المهمة قبل العومان، هو تبريد جسم وليداتهم الصغار شوية قبل ما يدخلو لما، خصوصاً إلى كانو خارجين من مكان سخون أو تعرضو للشمس لمدة طويلة، باش يتفاداو أي صدمة حرارية.

وبخصوص الحماية من أشعة الشمس، شدد حمضي على أن الواقي الشمسي بدرجة حماية 50 أو أكثر ضروري لدرادي صغار، مع وضعو قبل الخروج للشمس بـ20 حتى لـ30 دقيقة، وتجديدو كل ساعتين، وحتا من بعد كل مرة كيخرج فيها الطفل من لما، حيت لعومان كينقص من فعالية الحماية.

مصدر الصورة

وزاد ضاف الطبيب والباحث في سياسات وأنظمة الصحة، أن الوالدين خاصهم يوفروا للطفل مكان مظلل يرتاح فيه من بعد السباحة، سواء تحت “باراصول” أو فمكان بعيد على الشمس المباشرة، واختارو ليهم حوايج قطنية وخفيفة، أو حوايج خاصة للحماية من الأشعة فوق البنفسجية، ومايحيدوش ليهم’’الكاسكيطة” من فوق ريوسهم باش احميوهم من هاد الحرارة .

ونبه الطبيب من جهة اخرى، إلى أن الفترة ما بين 12 زوالاً و5 ديال العشية هي من أخطر الفترات للتعرض للشمس، داعياً الأسر إلى تجنب خروج الأطفال فيها، لأن أضرار الأشعة فوق البنفسجية كتكون قوية، والتعرض المتكرر لها يقدر يسبب مشاكل جلدية خطيرة على المدى البعيد، كتوصل حتى لسرطان الجلذ.

ومن بين النصائح الخاصة بالترطيب، أكد حمضي على أن الطفل خاصو يشرب لما بشكل منتظم، ومايتسناش حتى يحس بالعطش، مع تجنب المونادا والمشروبات اللي فيها بزاف ديال السكر، لأنها ماكتعوضش الجسم بالطريقة الصحيحة، وزاد ونصح الوالدين باش اعطيو وليداتهم الصغار الديسير والخضر اللي فيها لما، باش يعوض الطفل السوائل والأملاح اللي كيفقدها مع الحرارة والتعرق.

وختم حمضي بالتأكيد على أن البحر والبيسين كيكونو فضاء للترفيه فالحر، ولكن خاص التعامل معهم بحذر، خصوصاً مع الأطفال الصغار، لأن الوقاية والمراقبة المستمرة كيبقاو أحسن وسيلة لتفادي الحوادث والمضاعفات الصحية فهاد الفترة ديال السخونية.