بالنسبة ليا راه بزاف ديال المغاربة خلية نائمة، شوف غير كيفاش كيكذبوا ويشككوا ويخونوا الدولة في كل مرة كتفكك شي خلية إرهابية، كتلقى التعاليق كلها ضحك وتشكيك ومؤامرة، وكاين لي كيعتابر حتى العمليات الإرهابية لي سبق تداروا في المغرب من وراهم المخابرات و الدولة أو خطة صهيونية لتشويه الإسلام، هادو انا بعدا كنعتابرهم خلايا نائمة ولايقلون على هادوك لي دازو للفعل والإرهاب، لأن وحدين كيتفرگعوا ولخريين كيبرروا ليهم الإرهاب ديالهم، بينما من المفروض كون كنا في مجتمع عاقل راه خاص الجيران والحومة هوما اللولين يحضيو هاداك النوع، وغير يبانليك شي حد بدا يتأثر بالفكر المتطرف تعلم بيه مالين الوقت، ماشي تحتاظنوا وتدافع عليه ونهار يتشد تخرج تشهد بحسن السيرة والسلوك ديالو كان الله يعمرها دار درويش ممضصرش عليه بنادم، من الدار الجامع ومن الجامع للدار، راه هادي هي مواصفاتهم أصلا.

بالنسبة ليا أيضا أن أي واحد كيقسم الناس لمؤمنين وكفار وهم في النار ونحن في الجنة راه خلية نائمة، وأي واحد كيطالب العيالات يتستروا وباغي يمنع الاختلاط راه خلية نائمة حتى هو، وأي واحد كيطالب بحكم الشريعة راه خلية فايقة حالة عينيها وكتسنى غير الوقت المناسب باش تقربلها، وأي واحد كيدير فيديو كيطلب من المغاربة يفيقو يصليو الفجر عوض يبقاو سهرانين يتفرجوا المنتخب راه حتى هو خلية إرهابية حالة عين وسادة عين، وأي واحد كيطلب من المغاربة يلبسوا اللباس الشرعي ويديرو أي حاجة شرعية بالنسبة ليه راه خلية نائمة، وأي واحد كيخلي القانون شنو كيقول فشي واقعة ويمشي يشوف الشرع حتى هو خلية نائمة، والصراحة اللائحة ديالي تطول أكثر وتشمل بزاف دالمغاربة وغير بلاش نذكر كولشي دابا، كبرت على العدس في التشوپينا.

هو الصراحة المتطرفين والمتشددين باينين في المغرب وبزاف منهم معروفين، ومعروف منين كيجيبوا هاد الفكر وأصل الموشكيل، ولكن للأسف راه الدولة قايمة على نفس أسس داك الفكر، راه كيتقداو من سويقة وحدة، المغرب خاصو يتعلم من الامارات وحتى السعودية لي كانوا مصدر،كيفاش حاربوا الفكر المتطرف في بلدانهم، غير هادي تلاتين عام كانوا اشهر الإرهابيين وممولي الإرهاب والفدائيين من عندهم، دابا تقلبات الآية، والطريقة ساهلة جمع مصادر الفكر في حباسات معزولة او في الانفرادي ومنعهم من الاختلاط مع الناس، بالاظافة الى تطوير القوانين ديال البلاد تولي مدنية مية في المية بلا حتى مرجع فقهي، علاش غادي نمشي لمحكمة مغربية ذات نظام جابتو فرنسا اللائكية باش تحكم عليا بمقولات فقهية عمرها قبل الف عام، راه هذا هو اصل الموشكيل ولي غادي يخلي البلاد ديما قابلة لدعشنة والتطرف.