الوقت هوا اغلى حاجة عند الانسان، اغلى من الفلوس، و اغلى من اي حاجة اخرى، هانتا گاع عندك مليار د الدرهم فالكونط ؟ و لا مليار د الاورو واش تقدر تشري بيها واحد عشرين عام ؟ طبعا لا ! هاهوا بيرنار آرنو اغنى اغنياء العالم مول الشركة ديال LVMH و لا ايلون ماسك و لا ترامب عندهم الخماج د الفلوس و لكن واش يقدرو يرجعو ايام الشباب ديالهم ؟ لا ! واش يقدرو يشريو عشرين و لا ثلاتين عام اكثر من شنو غايعيشو ؟ لا !

و هاكاك الشعوب ديال الشيتهول كاونتريز مازال مصرين انهم يضيعو الوقت، بزاف د الوقت فشي نقاشات عقيمة و كاتعاود فحال واش الوشام حرام ؟ واش الموسيقى حرام ؟ واش البندير حلال و النواقس حرام ؟ واش ركبة الراجل حرام ؟ واش گدام المرا حرام ؟

نقاشات تافهة و عقيمة و اصلا اصلا هاد الشعوب جدبوها راه مقودة عليه و كاضيع وقتها غا فالتخربيق فالقهاوي و التيليفونات و التحنزيز و التبرگيك و مكملاها و مجملاها بهاد النقاشات القروسطية. عرفي شحال من مرة النقاش ديال واش الوشام حرام كايتطرح قدامي مثلا ؟ و لا واش يدين المرا حرام ؟شحال من مرة كانشوف هاد النقاش فالواقع و شحال من مرة كانشوفو فالمواقع ؟! مئات و آلاف المرات و كل مرة لي كايقول حرام كايجبد “الادلة” و لي كايقول حلال حتى هوا كايجبد “الأدلة” و الكشاكش خارجة و الدفال و الاعصاب و بزاف د الطاقة و الوقت و الجهد كايخصصها بنادم من حياتو لمواضيع خرائية فحال هادي !

واش كاينة شي دولة كاتنتج و كاتختارع و كاتبدع و المواطنين ديالها حاصلين فهاد النقاشات ؟ طبعا لاّ ! حيت مايمكنش مواطن كايضيع طاقتو فهاد الخرّيف يشيط ليه الوقت للابداع و الاختراع ! راه غي ربعة و عشرين ساعة فالنهار ! لاحيدتي منها النعاس و الماكلة و الطواليط شحال كايشيط لهاد الانسان د الوقت ؟

هاد النقاشات الناس حسموهم فالقرن ثمنطاش و جمعو و طواو هادشي د الحرام و الحلال و مشاو يخدمو على راسهم و يصنعو الأمجاد و حنا بنادم عندها ف2026, عصر الذكاء الاصطناعي لي الروبوات بداو كايرومبلاصيو الانسان فشلا خدامي ووظائف ! الانسانية كاتشد ثورة اقود من الثورة الصناعية و بعرور مازال كايسول فشي باج فايسبوك خوتي واش الركبة د الراجل عورة ؟

ياك آ وجه الركبة !