صبيطارات كازا باقي ملقاتش ليها وزارة الصحة الحل ؟ نقابيو الصحة كيطالبو بوقف الاختلالات بسبيطار ابن أمسيك وكيعلنو اعتصامات لشهرين ضد لفوضى وعشوائية تسيير .

مصدر الصورة

أميمة عطية – كود كازا ///

عبر المكتب الإقليمي للنقابة الوطنية للصحة على استيائو من حالة الاحتقان اللي ولى كيعرفها صبيطار ابن امسيك فالدار البيضاء، وحمل المندوبية الإقليمية للصحة والمديرية الجهوية والوزارة الوصية مسؤولية استمرار هاد الوضع، بسبب ما وصفو بتجاهل المطالب ديال الشغيلة الصحية وعدم التدخل لمعالجة الاختلالات اللي كيعاني منها هاد المرفق الصحي.

وعلن المكتب النقابي، فبلاغ ديالو ، على برنامج احتجاجي تصعيدي غادي يمتد لمدة شهرين، كيتضمن تنظيم اعتصامات قدام إدارة صبيطار ابن امسيك كل 15 يوم، حتى يتجاوب التفاعل مع المطالب اللي كتشوفها النقابة عادلة ومشروعة، ووضع حد لما وصفاتو بمظاهر سوء التدبير والتسيير اللي أثرت على السير العادي للخدمات.

وكشفت النقابة أنها قررات تخوض اعتصام جزئي لمدة 12 ساعة نهار الخميس 23 يوليوز الجاري، قبل تنظيم اعتصام ليوم كامل نهار الأربعاء 5 غشت المقبل، واعتصام آخر ليوم كامل نهار الأربعاء 19 غشت 2026، مؤكدة أنها محتافظة بحقها فخوض أشكال احتجاجية تصعيدية أخرى إلى بقات الأوضاع على حالها.

وانتقدت النقابة فبلاغها ما وصفاتو بـ”الاختلالات والسياسات الإقصائية والتحكمية” اللي كتعتمدها إدارة صبيطار ابن امسيك، معتبرة أن هاد الوضع ساهم فانتشار مظاهر الفوضى والعشوائية وسوء التنظيم، وهو الشي اللي انعكس، حسبها، على ظروف خدمة مهنيي الصحة وعلى جودة الخدمات المقدمة للمواطنين.

وختمات نقابة الشغيلة الصحية بلاغها، بتدخل عاجل من الجهات المسؤولة من أجل فتح حوار جدي، والاستجابة للمطالب المطروحة، وإيجاد حلول للاختلالات اللي كيعرفها الصبيطار، حفاظاً على السير العادي ديال هاد المرفق الحيوي