حنا نهضرو غا بالمنطق، واش عمّر التجريم ديال الدعارة ساهم فالاختفاء ديالها؟! واش كاينة شي دولة عبر التاريخ نجحات تقضي على الدعارة حيت هادوك لي كايمارسوها كايتشدو فالحبس ولا كايتعاقبو بأي شكل من الأشكال؟

الجواب هوا ” لاّ”

هاهوا المغرب من الستينات وهوا كايجرم الدعارة والفساد والوساطة وكايظلو البوليس والجدارمية خدامين مع الأوكار وكل ساعة كانسمعو بشي حملة، والمحاكم عامرين والمحامين والحباسات، واش هادشي قلل من الدعارة ولا منعها؟ طبعا لاّ وبالعكس عاد مازادت تفرگعات مع وسائل التواصل الاجتماعي والإنترنيت.

مؤخرا شفت الفيديو ديال شي مداهمة ديال وكر دعارة ومخرجين الناس مغطيين ليهم وجوههم والجيران كايزغرتو والصلا والسلام على رسول الله … فحالا مخرجين شي خلية إرهابية، هادشي كامل علاش؟ حيت راشدين بيناتهم قرروا أنهم يمارسو الجنس والكليان يخلص السيدة لي كاتقدم هاد الخدمة. وراها بصح خدمة، لاخرجنا الأمور من السياق المجتمعي والديني راه الجنس حتى هوا خدمة فحال بزاف ديال الخدمات، سيرفيس، فحال فاش كايجيك الجوع وكاتمشي لشي سناك كاتاكل بيتزا وكاتخلصها، ولا فاش كايجيك العطش وكاتشري قرعة د الما من مول الحانوت وكاتخلصو، حتى العمل الجنسي راه نوع من أنواع الخدمات لي ضرورية وخاصها تكون ولكن بشكل قانوني لي كايضمن الحماية للأطراف.

هادشي علاش واحد النهار غايخص يتفتح النقاش على العمل الجنسي فالمغرب، ماعرفتش داك النهار فوقاش واش من هنا عشرين عام ولا ثلاتين ولا ميات عام، ولكن هاد النقاش غادي يتطرح واحد النهار فحالي تطرح فالدول المتقدمة لي سبقاتنا.

حيت فاش كايتقنن العمل الجنسي، راه كاتحمي الزبون وكاتحمي حتى العاملة د الجنس، من العنف، الاعتداءات، الأمراض الجنسية… شحال من عاملة د الجنس كاتخلا دار بوها كل نهار وكاتخاف تمشي ديكلاري؟ شحال من وحدة تغتاصبات وتضربات وتخسر ليها وجهها وتشفرو ليها فلوسها؟ الآلاف وماعندهمش لي ياخد ليهم حقهم. وكذلك ومثال الكليان، شحال من واحد كايدي معاه شي وحدة كايفيق الصباح كايلقاها كشطاتو وخلات ليه غا الگرصون لي بات لابسو.

راه المشكل اليوم ماشي أنه الدعارة موجودة، المشكل هوا الدولة كاتعامل معاها فحالا ماكايناش، وكاتخلي آلاف الناس خارج الحماية القانونية لي نورمالمون الدولة مطلوب منها توفرها لجميع المواطنين.

وغادي يجي واحد النهار، غايتفرجو أحفاد أحفاد أحفاد المغاربة ففحال هاد الفيديوات ديال مداهمة وكر للدعارة بحي مولاي رشيد وسط فرح الساكنة، وغتجيهوم فحال شي قبيلة بدائية كاتحتافل بطريقة بدائية بمشهد بدائي ووغادي يسولو بعضياتهم: واش بصح كانت الدولة كاتخدم البوليس والجدارمية والمحامي القاضي حيت جوج د الناس دارو الجنس؟ غادي يجاوبو صاحبو: إييه، وكانو كايعتابرو هادي حرب على “الفاساااد” نعام آس… كيخ كيخ كيخ..