تقرير: واش تقدر عليها وزارة الصحة؟ المغرب خاصو 83 ألف مهني صحي فيهم فراملية وتقنيين و27 ألف طبيب قبل 2030 .

منذ

أميمة عطية – كود كازا ///

كشف تقرير حديث ديال وزارة الصحة والحماية الاجتماعية أن المغرب غادي يحتاج إلى حوالي 83 ألف مهني صحي إضافي فعام 2030، من بينهم 27 ألف و673 طبيب، و55 ألف و347 فرمليا وفرملي وتقني صحة، باش يقدر يوصل للمعايير اللي كتوصي بها منظمة الصحة العالمية.

وحسب معطيات الحصيلة الاجتماعية للموارد البشرية 2025/2026، فالمغرب كيسجل دابا معدل 2.20 مهني صحة لكل 1000 نسمة، بينما المعدل الدولي المطلوب هو 4.45 لكل 1000 نسمة، وهادشي كيبين خصاص كبير فالموارد البشرية الصحية.

وفهاد السياق ، زاد وضح التقرير أن جزء من هاد نقص ، خصوصاً لفرامليا وتقنيي الصحة، اقدر يتغطى حيت كاين أكثر من 30 ألف إطار دابا فمرحلة التكوين، واللي متوقع يلتحقو بالقطاع فهاد الأعوام لي جايا.

ومن ناحية التركيبة العمرية، كيبلغ متوسط عمر العاملين فالقطاع الصحي 37 سنة، مع تسجيل أن أغلب لفرامليا وتقنيي الصحة (79%) والأطباء (51%) أعمارهم أقل من 42 سنة، وهو ما كيعكس وجود فئة شابة داخل القطاع.

وبنسبة لنوع الاجتماعي، فالتقرير كيبين حضور قوي لمرا ، بحيت لعيالات كيشكلو 66% من مجموع موظفي وزارة الصحة والحماية الاجتماعية، مع نسب مرتفعة وسط لفرامليا وتقنيي الصحة (75%)، و55% وسط الأطباء، و49% وسط الأطر الإدارية والتقنية.

وفي ما يخص المستقبل، التقرير كينبه إلى ضرورة الاستعداد لمرحلة 2026-2030، اللي غادي تعرف إحالات متزايدة على التقاعد، وهو ما كيزيد الضغط على المنظومة الصحية ويخلي مسألة تجديد الموارد البشرية أولوية مستعجلة