ناض الصداع فاجتماع لجنة العدل والتشريع بمجلس النواب، اللي كان مخصص للقراءة الثانية ديال مشروع قانون مهنة المحاماة. الأجواء توترت لدرجة أن رئيس اللجنة، سعيد بعزيز، اضطر يوقف الجلسة شوية باش يعطي فرصة لفرق الأغلبية يتشاوروا بيناتهم واش يطلبوا التأجيل ولا لا. فهاد الوقت، كان وزير العدل عبد اللطيف وهبي باين عليه الغضب وطلغ ليه الدم بزاف.

السبب اللي خلا الجلسة توقف هو “نقطة نظام” جبدها البرلماني عن حزب الأحرار، سعيد بنمبارك. هاد الأخير للي هو محامي معروف فالعاصمة طلب يعطيوهم يومين ولا ثلاثة أيام زيادة باش يقروا ويشوفوا التعديلات اللي دارها مجلس المستشارين على القانون، حيت بان ليه بلي هاد التعديلات كتيرة وخصها نقاش عميق.

بنمبارك ما عجبوش الحال حتى من الطريقة باش تبرمج هاد الاجتماع، وقال بلي رئيس اللجنة حدد الموعد بوحدو بلا ما يشاور مكتب اللجنة كيفما مولفين، وزاد فكرهم بلي اللجنة ديما كانت كتخدم بالتوافق. وفوق هادشي، عاتبهم حيت الاجتماع اللي كان مفروض يدار نهار الاثنين تلغى بلا ما يعلموهم بشكل واضح.

من جهتو، دافع رئيس اللجنة سعيد بعزيز على راسو، وقال بلي الموعد تم الاتفاق عليه قبل وداروا بحساب الظروف ديال كاع الفرق، بما فيهم فريق الأحرار اللي كانوا مسافرين خارج الرباط. وزاد وضح بلي الاتفاق كان هو يدار الاجتماع الاثنين ولا كاع نهار الخميس، وأكد بلي هادشي كامل موثق بالصوت فالتسجيلات ديال اللجنة.

بعزيز رفض هاد الهضرة واعتبرها “مزايدات”، وقاليهم بلي كلشي مسجل، وقرر يرفع الجلسة لخمسة دالمقايق باش يخلي الأغلبية يتشاوروا، وأكد بلي يلا قدموا طلب رسمي للتأجيل غادي يقبلو.

هاد القرار ديال توقيف الجلسة زاد شعل العافية. البرلمانية عائشة بن عزة (من حزب الاستقلال) هاجمات رئيس اللجنة وقالت ليه:”هادشي تحكم، وأنت كدير غير اللي بغيتي”، حيت وقف الجلسة قبل ما يعطيها الكلمة تهضر باسم فريقها.

حتى البرلمانية زينة إدحلي (من الأحرار) انتقدات هاد الطريقة، وقالت بلي نائب واحد ما يمكنش يهضر باسم الأغلبية كاملة، وما كاين لاش توقف الجلسة على قبل هادشي، وكان خصو يخلي باقي النواب يعبروا على رأيهم.

من بعد هاد الروينة كاملة، رجع رئيس اللجنة سعيد بعزيز واستأنف الاجتماع. وقال بلي اتصل بيه منسق الأغلبية وأكّد ليه بلي ما غادي يقدموا حتى شي طلب ديال التأجيل، وبلي يمكن ليهم يكملوا الخدمة ديالهم عادي، وهادشي اللي خلاهم يرجعوا يكملوا جدول الأعمال ديالهم.