أصدرت المديرية العامة للأرصاد الجوية فالمغرب نشرات إنذارية من مستوى اليقظة البرتقالي، كتحذر من موجة حر استثنائية كتشمل عدد من الأقاليم المملكة، وكتتراوح فيها درجات الحرارة العليا ما بين 38 و45.

وفهاد السياق، وفي تصريح خاص لـ”كود”، كال الدكتور حمضي إن موجات الحرارة ما خاصهاش تتاخد باستخفاف، لأنها تقدر تسبب مضاعفات صحية خطيرة، وتقدر توصل حتى الموت بسبب الجفاف الحاد أو السالمة أو بجوج، مؤكداً أن الخطر كيبقى أكبر عند الأطفال، كبار السن، والمرضى، لكن حتى الأشخاص الأصحاء يقدرو يتعرضو لمضاعفات إذا ما احترموش قواعد الوقاية.

ووضح حمضي، أن أول قاعدة هي شرب لما والسوائل بشكل منتظم قبل منحسو بالعطش، قبل ما يفقد الجسم الما.

وزاد ضاف المتحدث، أن الماء بوحدو ما كافيش، ولكن خاص حتى العصائر الطبيعية، صوبا، والخضر وديسير لتعويض لما والأملاح المعدنية، مع تجنب الإفراط فالقهوة، أتاي والمشروبات السكرية لأنها كتزيد تفقد الجسم السوائل.

وأكد نفس المصدر، أن تبريد الجسم كيبقى من أهم وسائل الوقاية، سواء في “دوش” خفيف عدة مرات فالنهار أو تبليل الوجه والأطراف والجسم بالما، خصوصاً بالنسبة لدراري صغار والمسنين، مع تعريض الجسم للهواء أو فرفارة باش يبرد بزربا.

مصدر الصورة

وفي ما كيخص تهوية ديور، دعا الدكتور حمضي إلى الحفاظ على البرودة داخل البيوت وخاص شراجم اتسدو بنهار وتحلو بليل وصباح بكري .

وأكد الخبير، على المغاربة باش ميخرجوش، ما بين 11 دالصباح و9 ديال الليل، إلا للضرورة، ولبسو حوايج قطنية خفيفة واسعة وفاتحة اللون، واديرو كاسكيط، وتجنبو أي مجهود بدني كبير تحت أشعة الشمس.

وحذر حمضي، من ترك دراري صغار وناس كبار فالسن أو المرضى والأشخاص ذوي الهمم فطوموبيلات ولو لدقائق، حيت درجة الحرارة كتطلع بزربا وتقدر تشكل خطر على حياتهم.

وختم الدكتور حمضي تصريحو، وأشار للأعراض لي كتستوجب التدخل السريع والتوجه للسبيطار، لأن التأخر فالعلاج يقدر يؤدي إلى مضاعفات خطيرة وهي لعيا بزاف، الدوخة، العطش المفرط، الصداع، تشنج العضلات، الغثيان، القيء، الإسهال، اضطراب الوعي أو فقدان الوعي.