توفيق بوعشرين مدير النشر السابق ليومية “اخبار اليوم” ظلم الصحافيين والصحافيات اللي مشاو يديرو تغطية لمونديال امريكا المكسيك كندا. البارح رسل ليهم “رسالة غير رقيقة” و”غير ودية” فيها بزافت الاستاذية. كتعطي الدروس.

قلتي باللي الوفد سافر بدعم من الجامعة الملكية المغربية لكرة القدم بلا ما تتحرى. سول غير المقاولات للي رسلات صحافيين وصحافيات سولها شحال خلصات. كل مقاولة خلصات على راسها. على صحافييها. باش تغطي المونديال خاص كل صحافي يكون عندو اعتماد. هاد الشي كيكون بين الصحافي والفيفا. البلدان فالمونديال كيكون عندها عدد اكبر. المقاولات الاعلامية خلصات كثرب من النص والباقي تحملاتو الجمعية الوطنية للصحافة والناشرين. هي كجمعية ففرعها المخصص للرياضة عندها شراكات مع الجامعات الملكية منها الجامعة الملكية المغربية لكرة القدم

بعد الاعتماد كل مقاولة خلصات على راسها. هاد المرة داز كلشي على وكالة اسفار. هاد المونديال لعبات الجمعية الوطنية للصحافة والناشرين دور كبير باش ما يعيشوش الصحافيين التشرد اللي عاشوه فمونديال قطر وما يتكرفصوش كيف تفكرفصو فمونديال روسيا. صحافيون مصورون باتو فالمركز الاعلامي. ديك الساعة كانت الجامعة كتعطيهم مبالغ وطالبو صحافيون باش ما تبقاش هاد العادة.

دابا باش اول مرة وفد اعلامي غادي بفلوس المقاولات الصحافية فظروف اكثر من مزيانة خارج كتقول فلوس الجامعة. هاد الشي ماشي دقيق ماشي صحيح. فايك.

من حقك تنتاقد التغطية الاعلامية. من حق كل جريدة وانت سيد العارفين يكون عندها خط تحريري دافع على توجهها. حنا يا سيدي فكود خلصات على صحافي يمشي وبغيناه يركز غير على البيرا اللي ما بقاتش فبوسطون باش لعبو الاسود ضد اسكتلندا. شغلنا هادي. من حقك تعبر حتى انت على معارضتك لهاد التوجه.

الاعلام راه ماشي بالطريقة اللي كتحاول تسوقو. فيه الدروسية والاستاذية والتعالي. راه الصحافة الامريكية والبريطانية والالمانية ووو عندهم الصحف الجادة والصحف اللي باغية غير البيبل وتابعة غير لفضايح. ما عمرك تشوف شي صحافي من الصحف الجادة يخرج يسب الصحف الاخرى.

بخصوص التوني اللي لبسوه عدد من الصحافيين وماشي كلهم، قلتي بلا ما تحرى من المعطيات ديالك باللي “جل أعضاء الوفد الصحفي المرافق للمنتخب الوطني يرتدون قمصان الفريق الوطني ، في تماهٍ لم يسبقنا إليه أحد في الخلط بين المشجع والصحفي”. هنا كذبتي. كذبتي لان هاد الشي كيديروه صحافيو العالم كولو باستثناء صحافيي الغرب. تلقى صحافيو منتخبات افريقيا كيلبسو التوني ديال بلادهم ومن زمان. تلقى صحافيو دول من اسيا كيلبسو التوني ومن زمان. كتلقى الصحافيون المصريون والجزائرون والتوانسة كيلبسو توني منتخبهم. ماشي لمغاربة اللي دشنو لهاد الشي. واللي نشراتو “بوسطن گلوب” راه ماشي دقيق. تشوف صحافيو الدول المشاركة فالمونديال قبل ما تهدر على لمغاربة. ممكن يكون عندك موقف. ولكن راه صحافيون مشاركين فالوفد عندهم موقف وما عمرهم لبسو التوني. واش باغي تصادر حقوق الصحافيين.

السابقة الوحيدة فهاد المونديال اللي ما قدرتيش تهدر عليها وكانت قبل، هي قناة الشيخة موزة وولدها. قناة دولة قطر الداعمة للاخوان المسلمين “بيين سبورت”. هادو ماشي غير متحيزين بل زرعو الفتنة. تغطية بعضهم كتشعل الشعوب ماشي كتغطي الماتشات. شوف اش كيقول ابو تريكة واش كيقول حفيظ الدراجي واش كيقولو خراين.

اللي دشن لهاد السابقة ماشي لمغاربة. اللي دشن ليها هما المشارقة. هما صحاب الخليج وشي مصريين.

من حق الصحافي يلبس التوني. انتاقدو باش يسوق لكذوب والتحريض على الكراهية والعنف.

راه الرياضة كلها عواطف ومشاعر. راه صحف فدول بحال اسبانيا تابعة لاندية. الريال عندها ماركا وبرشلونة عندها “سبورت” وما عمرني سمعت نقاش فاعلامهم على هاد القضية.

ما يمكنش تعطي الدروس للصحافيين الرياضيين وللصحافيات الرياضيات وانت سبق ليك شغلتي مسؤولية النشر فجريدة وارادة التحرير فاخرى. كتعرف كلشي. الخطورة ماشي فهاد الشي. الخطير على الاعلام هو غياب قوى حية قوية وفعالة وعندها الشجاعة تدعم حرية الصحافة. هاد القوى يكون عندها حتى القدرة المالية لدعم مشاريع. الخطير اكثر على الاعلام هو دخول المال الاجنبي خاصة الخليجي باش يتحكم فالخط التحريري.

هادا موضوع جدير بالنقاش. راه مشيتي للحيط لقصير. اعتذارك لهاد الصحافيين والصحافيات غير مقبول بعد الاساءة ليهم. قصد الصح. هدر على الدولة وباراكا من التقلاز من تحت الجلابة. هدر على فين كاين المشكل بالضبط ولا خفتي على راسك سكت وبقى تهدر غير على السياسيين والاحزاب السياسية وخلي عليك الصحافيين والصحافيات.