علمت “كود” ان عصابة الملثمين اللي دارت حالة فالمدينة الخضرا بوسكورة من المرجح بزاف تكون شينوية. حسب مصادر “كود” تشد هادي يومين ف”سي جي اي” شينوي بان ليه واحد من السيكوريتي نقز لفيلا مع شي صاحبو. هاد السيكوريتي حسب مصادر “كود” نقز وطار على واحد وشدو. لاخر هرب. طبعا دار القانون وعيط على الجدارمية لان هاد الجهاز اللي كاين فالمدينة الخضرا.

حسب مصادر “كود” فهادا اللي طاح كشف على اللي معاه وتشدو جوج.

مصادر “كود” توقعات باللي هادي هي العصابة اللي كانت شفرات 6 الفيلات فبريستيجيا و3 لابارت ووحدة فبالموري واخرى هادي مدة فالسي جي اي. التحقيقات بما فيها من تعقيدات الترجمة واعلام مصالح الدولة اللي منها هادو اللي طاحو، غادية تكون شوية طويلة

حسب معطيات عند “كود” فالطريقة ديال الشفرة والطريقة ديال دخول الڤيلات والتوقيع والطريقة ففتح الكوفر كلها كتبين باللي عصابة احترافية وعندها ماتيريال واعر.

هاد القضية ديال جنسية العصابة، حسب معطيات حصلات عليها “كود”، كان انتبه ليها مواطن مغربي عايش فامريكا وعندو فيلا فالسي جي اي. من فيديوات الكاميرات ديال الفيلا ديالو اللي لاصقة فأول فيلا تشفرات، انتابه باللي هادو اللي دخلو كيهدرو بالشينيوية. دابا طلع كلامو صحيح،

دابا هاد العصابة كانت تشفر لفلوس والذهب والحلي والساعات الغالية. ما كتقرب لحتى حاجة اخرى.

المشكلة فمدينة فيها كثر من 50 الف نسمة او اكثر فهو انها مازال تابعة للجدارمية وفيها بريگاد عناصرها ما فايتاش 12. طبعا هادو خاصهم يديرو تحقيق فقضايا بحال هادي ويقادو السير ويتكلفو بامور اخرى.

بعد الشفرة اللي وقعات ناضو السانديك اجتاهدو وما عرفناش هاد لملكخين اللي قالوها ليهم وبغاو يخالفو القانون. اي واحد يتمشى فمدينة دارت للمشي عادو يسولوه السيكوريتي فين غادي. شوفو كيفاش اللي ما قدرش يشد مجرمين باغي يدير الامن. غباء وصافي.

هاد لمدينة خاصها تولي تحت اشراف البوليس. الجدارمية عندهم ما يدار. عددهم قليل يتكافاو غير مع المناطق المجاورة.