فائض الدجاج : فرصة باش المغرب يبني صناعة غذائية قوية عوض ما يقلص الإنتاج ..باش حسن منا البرازيل لي كتيبع الدجاج حلال للمسلمين ؟ .

مصدر الصورة

كود -عثمان الشرقي //

الأزمة اللي كيدوز منها قطاع دجاج فالمغرب دابا بينات واحد المشكل قديم ديال …الإنتاج والطلب ،المهنيين كيهضرو على كثر من 15 مليون كتكوت كيتنتج كل سيمانة ، و السوق المغربية ما كتستهلكش أطكثر من 9 ملايين فالأوقات العادية، وكيهبط الرقم حتى لـ7 ملايين مباشرة من بعد عيد ،النتيجة كانت هي وفرة كبيرة فالدجاج، وخسائر كتلاحق المربين.

ولكن هاد الوضع ما خاصوش يتشاف غير كأزمة، وانما حتى فرصة لإعادة التفكير فمستقبل القطاع ،المشكل ماشي فالإنتاج بوحدو، ولكن فكون أغلب الدجاج كيتباع حي أو مذبوح بالطريقة التقليدية، بلا ما يدوز من مراحل التصنيع اللي كتخلق قيمة مضافة ومداخيل أكبر.

اليوم، كاين طلب كبير على منتجات محولة بحال شرائح الدجاج، الشاورما، الكفتة، النقانق، البرغر والوجبات الواجدة، هاد المنتجات ما كتسمحش غير بتثمين الدجاج، ولكن كتفتح أسواق جديدة وسط المغرب وعلى برا، وكتخلق فرص شغل فالصناعات الغذائية والنقل والتوزيع.

ومن بين الحلول المهمة ، الاستثمار فمراكز التجميد والتخزين ،هاد البنيات تقدر تمص الفائض ملي كيكون العرض كبير والطلب ضعيف، وتخزن المنتوج حتى يتحسن السوق، كما يمكن إدماج منتجات الدجاج المحول فبرامج التغذية المدرسية، والسبيطارت، والقشالي ، والحباسات، وهي أسواق كبيرة وقادرة ضمن طلب مستقرا طول العام.

على مستوى التصدير، خاص المغرب يستغل موقعو واتفاقياتو التجارية باش يفتح أسواق جديدة، خصوصاً فدول غرب إفريقيا اللي كيزيد فيها الطلب على البروتين الحيواني، موريتانيا والسنغال يقدرو يكونو بوابة طبيعية لمنتجات الدواجن المغربية القارة الإفريقية.

التجربة البرازيلية كتأكد أن فائض الإنتاج ماشي بالضرورة كارثة ،البرازيل حولات الفائض ديالها لصناعة تصديرية كبيرة، وطؤ ولات أكبر مصدر للدجاج فالعالم بفضل الاستثمار فالتصنيع والتجميد وتطوير منتجات موجهة لكل سوق حسب الحاجيات ديالو،لدرجة كيصدرو دجاج ”حلال“ الشرق الأوسط.

المغرب عندو جميع المقومات باش يدير نفس الشيء، خبرة فالتربية، موقع استراتيجي، ومنتوج مطلوب فأسواق كثيرة. داكشي علاش الحل هو ماشي غير فتقليص الإنتاج، وانما فخلق صناعة غذائية قوية قادرة تحول فائض الدجاج من مشكل اقتصادي لمصدر للثروة وفرص الشغل.