نزار كاعي على الاستقلاليين اللي ضربو الطم وخلاو الحزب كياكل العصى وبغاهم يخرجو لمواقع التواصل يدافعو على موقف الحزب فمجلس المستشارين.. والكاتب العام ديال النقابة برطاجا توضيح ضعيف ومهزوز والزومي تخلطو ليها العرارم بين تسقيف الأرباح وتسقيف الأسعار .

مصدر الصورة

كود كازا//

نزار بركة الأمين العام لحزب الاستقلال كاعي على الاستقلاليين اللي ضربو الطم وخلاو الحزب كياكل العصى وكيتعرض للانتقادات والاحراج.

نزار زاد كعى ملي خرجو ليه فيدويهات ديال الحملة الانتخابية ديال 2021 كيهضر على تسقيف الأسعار، وفيدهوات كينتاقدو الحكومة بسبب غلاء أسعار المحروقات.

واخا نزار كيخرج فكل ويكاند يدير المعارضة بمنطق شعبوي ديال واحد فالحكومة وكينتاقد سياستها وتدبيرها، ردود وتفاعل الاستقلاليين مع الحملة الغاضبة ديال الرأي العام واللي كتعتبر الأكثر قوة بسبب تصويت نقابة الاستقلال الاتحاد العام للشغالين خلافا لكاع النقابات مع الأغلبية الحكومية.

تصويت نقابة الاستقلال ماشي مشكل فحد ذاتو، ويقدر يبان طبيعي النقابة تمشي مع قرار الحزب اللي تابعة ليه. المشكل هو أن هاذ التصويت فرش الأمين العام نزار بركة اللي تأكد للمغاربة أنه كيكوي ويبخ وأنه ملي كيخطب فالمهرجانات وكيهضر فوسائل الاعلام كيكون غي دايرة الحملة وسارح المغاربة، بينما ملي كيكون الحزب فموقع اتخاذ القرار فكيدير داكشي اللي فيه مصلحتو، وهنا كيبان نزار مستاعد يعبر على الموقف والنقيض ديالو بحال للي بان ملي هضر هاذي أسبوع على حماية القدرة الشرائية كأحد ركائز برنامجو الانتخابي ولكن هاذ الهضرة غي لدغدغة مشاعر شعيبة.

بعد خطاب الفراقشية والخفافيش الظلامية نزار وتحت ضغط أنه باغي يولي رئيس حكومة بأي ثمن ولى كيدخل ويخرج فالهضرة وباين معندو حتا استراتيجة سياسية مقنعة باش يأخذ بوسط رئيس حكومة اللي كيبان دابا كبير وهو اللي مقدرش حتا يدافع على راسو ونهار جا يهضر زاد ورط نفسو ومقدر يقنع حتا واحد وهاذ الشي اللي كيبان من ردود فعل المغاربة فمواقع التواصل الاجتماعي اللي حتا واحد ممقتانع برواية حزب الاستقلال.