ها علاش گروب الاتراسي والعمدة المودني مقدموش الاستقالة.. مصدر فالأحرار فالرباط لـ"گود": باغين يتفاوضو وحنا ف نقاش معهم.. ويلا مبغاوش يحشمو غانقيلوهم ونتاخبو عمدة جديد .

مصدر الصورة

كود الرباط//

علمت “گود” من مصدر مطلع، بلي مسؤولي حزب التجمع الوطني للأحرار بجهة الرباط سلا القنيطرة، فهمو مساج رئيس مقاطعة السويسي عادل الاتراسي ومن معه، ودخلو فمفاوضات معهم.

حسب مصادر “گود”، فهاد الگروب المتمرد للي كيقودو عادل الاتراسي، وجر معه حتى عمدة الرباط، للي بانت شخصيتها ضعيفة سياسيا، وكولشي كيتساءل كيفاش عمدة يجرها ويتحكم فيها رئيس مقاطعة، (هاد الگروب المتمرد) تبين بلي مباغيش يستاقل من الأحرار، ولكن دار داك البيان العجيب للي معندو أساس قانوني باش يثير انتباه قيادة الحزب وفقط.

وفعلا هذا ما تم، بحيث تواصل المنسق الجهوي للحزب بجهة الرباط سلا القنيطرة، سعد بنبارك، مع هاد مجموعة الاتراسي، باش يشوفو شي صيغة للاتفاق والتراجع عن الاعتزال السياسي والانتخابي.

بالنسبة لحزب الأحرار، عندو اختيارات كثيرة، منها يقيل هاد الأعضاء ويعاود تشكيل مكتب مجلس جماعة الرباط، وكذلك مجلس مقاطعة السويسي ويستغنى على الگروب للي غادي يمشيو يقلبو على شي حزب اخر، او يرجعو للحركة الشعبية فين كانو أصلا قبل. هاد الخيار ممكن ولكن مستبعد حاليا، حسب مصدر ف الأحرار.

يشار بلي منتخبين من “الأحرار” بمقاطعة السويسي، وعلى رأسهم رئيس المقاطعة عادل الاتراسي، ومقربين منو، معاهم حتى عمدة مدينة الرباط، فتيحة المودني. خرجو ببيان الاعتزال.

المجموعة للي كيقودها الاتراسي داير سميتو فوق اسم العمدة، خرجات بـ بيان، كيعلنو فيه “اعتزال العمل السياسي والانتخابي والحزبي نهائياً ورسمياً من حزب التجمع الوطني للأحرار”.

هاد “الاعتزال الجماعي” كيبين بوضوح أننا قدام حالة ديال الجبن السياسي”، يقول مصدر في حزب الاحرار، مضيفا “هادشي تحايل مفضوح المفضوح على القانون التنظيمي للأحزاب والجماعات الترابية. علاش هاد الناس ما قدموش استقالة قانونية واضحة وصريحة وصيفطوها للمصالح المختصة وللحزب؟”.

الجواب ساهل ومرتبط بـ “الامتيازات والمنصب”، والمصالح مع المواطنين، وكذلك الخوف من “التجريد” وفقدان المناصب، يوضح نفس المصدر.

القانون المغربي واضح، إذا قدم المنتخب استقالتو من الحزب اللي ترشح باسمو، كيفقد مقعدو فـ المجلس والمكتب (حسب المادة 51 من القانون التنظيمي للجماعات والمادة 22 من قانون الأحزاب).

رئيس المقاطعة، العمدة، رؤساء اللجان، ونواب الرئيس اللي موقعين فـ الوثيقة، باغيين يضغطو على حزب “التجمع” ويهددو بالهروب منو ولكن فـ نفس الوقت باغيين يبقاو شادين فـ الكراسي ديالهم، يستافدو من التعويضات، السيارات، والوجاهة للي كتعطيها هاد المناصب حتى لآخر نهار فـ الولاية الانتخابية.