اش كيجمع قضية خرجات هاد ليام ديال شي طاشرون اسمو الخيمة واللي بداو شكايات تخرج ضدو وتفضح اساليبو، مع حاكمة عين الدياب فكازا اللي دارت شرع يدها ودارت مطاعم غير قانونية قبل ما طيق السلطات القانون، مع فضيحة هدم عمارة فيها مكتب محامي واحتجاج اصحاب البدلات السوداء مع هدم بناية مصنفة فالتراث فكازا بقرار من عامل انفا الاسبق عفيرات واللي بسبابها تم اعفاؤو مع فضايح بدار بوعزة من بناء وحدات صناعية فاراضي فلاحية حتى استعلال الملك البحري….. اللي كيحمع بين هاد لفضايح والقضايا اللي هزات كازا هو تردد اسم لملايري السمسار اللي كيستغل الصحافة. فهاد القضايا وغيرها كثير كاين حضور هاد المستغل للصحافة.

الغريب ان مصالحو المباشرة بحال استغلال وحدة صناعية فاراضي فلاحية، ما تمساتش. الغريب ان قرارات وزارة الداخلية بتطبيق القانون ما مساتوش. هاد السمسار اللي كيقدم راسو قدام ضحاياه باللي قادر يواجه وزير الداخلية لفتيت، ما قدراتش السلطات طبق على خروقاتو لكثيرة القانون.

لان هاد السمسار لملايري اللي كيستغل الصحافة ما كيعيش الا فالفوضى واللا قانون، فكيطلق اشاعات باللي كاين بحالو فالقطاع. طبعا فيساع كيتفرش.

راه ما عمر قطاع الصحافة فالبلاد اللي عندو تاريخ من النضال والالتزام والدفاع عن الحريات والحقوق ديال لمغاربة، عرف وجود بنادم بحال هادا. بحال هاد لملايري السمسار اللي كيستغل الصحافة. هو دخل للتاريخ كأول واحد محسوب خطأ على القطاع، طلقات دعوة للاحتجاج ضد اساليبو. هاد الدعوة كان طلقها ناشط فالدفاع على المال العام ومحاربة الفساد. كانت سابقة فتاريخ هاد المهنة. احتجاج ضد احد رموز الفساد. كان الناشط بغى يديرها قدام الجريدة فين كيخدم قبل ما يتم اعتقالو فقضايا كتهم سبو لقضاة ….
دابا فقضية الخيمة هاد السمسار لملايري اللي كيستغل الصحافة داخل بقوة. كيتحكم فهاد الخيمة. طبعا كلشي بمقابل. امبراطورية الخيمة غادية طيح. كاين شكايات كثيرة ضدو واكيد غادية تكون تحقيقات غادية تفتح باش يعرفو كيفاش كيخدم هاد الخيمة اللي راكم لملاير بالوداديات السكنية قبل ما يولي من اباطرة الملاسة فكازا.

فسقوط الخيمة يقدم يكون بداية سقوط هاد “الوهم” اللي خلع عدد من كبار رجالات كازا قبل ما يتخذ قرار باش يسدو عليه. دابا طالق اشاعة باللي عامل النواصر دايرو خاتم فيدو كيف كيطلق اشاعة باللي العمراني اللي كان فالجمارك وللي ولى الخازن العام، كيخاف منو وكيلبي كاع طلباتو، كيف كيسوق باللي كبار الدولة كيتاصلو بيه. طبعا كثير من هاد الشي غير لكذوب. امبراطورية هاد لملايري غادية تتفكك وخاصو يخلص على كل ملف فساد كان ليه يد فيه واول هاد الملفات ملف مول الملاسة الخيمة