الخروج الإعلامي الأخير لسمير كودار، عضو المكتب السياسي لحزب الأصالة والمعاصرة، والمكلف بتدبير ملف الانتخابات فالبام، كان تحول وسط هاد الحزب خصوصا وأن هاد القيادي معروف أنه كيشتغل ف الظل بعيدا عن الأضواء.

كودار للي كيوصفو البعض بـ”مهندس الظل” ديال التزكيات ف البام، خرج للتواصل فلقاء مع ميدر راديو فبرنامج بدون لغة الخشب للي كيقدمو رضوان الرمضاني. هاد الخرجة وضعت النقط على الحروف فيما يخص كل التأويلات والتسريبات للي خرجات مؤخرا سواء المتعلقة بمستقبل القيادة الجماعية او دخول جوكير الحكومة فوزي لقجع للحزب وبالتالي إمكانية يكون بديل للقيادة الجماعية، وكذلك ما أثير من شبهات حول عقار تسلطانت المملوك لعائلة فاطمة الزهراء المنصوري.

ولأول مرة منذ سنوات طويلة، اختار القيادي في حزب “الجرار” سمير كودار، يتخلى على أسلوبو القديم، خصوصا وأنه كان معروف برجل التنظيم، وضابط الإيقاع في تدبير الخلافات الداخلية الحادة وتوزيع التزكيات، وهو لي قاد تزكيات الحزب فالمحطات الانتخابية لعام 2021 وكان البام نافس بقوة على المرتبة الأولى.

هاد الخرجة الإعلامية جات ف توقيت دقيق وحساس، بحيث نفى كودار الغموض للي داير على وجود ترتيبات لإزاحة القيادة الجماعية الحالية، مؤكداً أن فكرة عقد مؤتمر استثنائي أو مجلس وطني استثنائي لتغيير معالم القيادة الحالية “غير مطروحة نهائياً وليست موضوع نقاش في أجهزة البام المعنية”.

ووصف عضو المكتب السياسي ما يتم تداوله في هذا الصدد بـ”كالهضرة الخاوية”، مشدداً على أن القيادة الجماعية الحالية هي التي ستتولى مواصلة تدبير شؤون الحزب والاستعداد للاستحقاقات التشريعية والسياسية المقبلة المبرمة في شهر سبتمبر.

كما دافع بشراسة على زعيمة الحزب فاطمة الزهراء المنصوري وقال بلي مستعد يمشي بعيد ويكون انتحاري من أجل الدفاع عليها وعلى سمعتها ونفي كل الشبهات للي خرجات عليها.

من المساجات للي صيفط هاد القيادي، هو يحد من الطموح ديال يونس السكوري لخلافة القيادة الجماعية، وقال بلي للي عندو شي طموح يخرج يعلنها بشجاعة.

خروج “مهندس الانتخابات” إلى العلن هو بداية إعلان واضح بلي البام دخل مرحلة التعبئة القصوى فالاستعداد للانتخابات الجايا. إعلاميا وسياسيا غايبقاو قيادات البام يبانو، بعدما خرج كودار، جايا النوبا على للي كيدبرو العمليات الانتخابية وعندو تأثير قوي بحال المهاجري.