المدير الإقليمي لوزارة التعليم فعين السبع -الحي لمحمدي لـ"كود": 6048 مترشحة ومترشح دوزو الامتحان الجهوي للسنة أولى باك فـ16 مركز و208 من ذوي الهمم استفادو من "التكييف" .

أميمة عطية كود كازا ///

سالات البارح الثلاثاء 2 يونيو، امتحانات الدورة العادية للامتحان الجهوي الموحد للسنة أولى باك فالمغرب، بعدما دوزوها آلاف التلميذات والتلاميذ بمختلف الأكاديميات الجهوية، فظروف تنظيمية عادية.

وعلى مستوى مديرية عين السبع – الحي المحمدي، رافقات “كود” عملية استقبال وتوزيع مواضيع الامتحانات بثانوية ابن هانئ بعين السبع، بحضور إدارة المؤسسة والأساتذة والمفتشين، فجو تنظيمي مزيان.

وفهاد السياق، كال عبد العالي خلاد، المدير الإقليمي لوزارة التربية الوطنية والتعليم الأولي والرياضة بعين السبع – الحي المحمدي، فتصريح لـ”كود”، بلي المديرية عبأت الأطر الإدارية والتربوية وواكبات المستجدات اللي جات بها الوزارة فهاد الاستحقاق، باش دوز بأمان واستعملات لأول مرة “الباراي” د الوزارة باش تحقق مبدأ تكافؤ الفرص بين جميع المترشحين، وتحارب الغش.

مصدر الصورة

وزاد ضاف المسؤول نفسو، أنه كاين 32 ملاحظ ومنسق إقليمي لتأمين تتبع سير الامتحانات في 16 مركز مختلف، ولي أكد على أنها دازت في ظروف عادية بلا تسجيل أي مخالفات او حالات ماشي عادية.

وختم في تصريحو، بعدد ديال المترشحين والمترشحات اللي اجتازو هاد الامتحان الجهوي على مستوى المديرية وصل لـ 6048 تلميذة وتلميذ، من بينهم 208 من ذوي الهمم لي استافدو من ظروف “التكييف”، أي تخفيف الامتحان بنسبة للتلاميذ لي عندهم عسر في القراءة، ومشكل فالشوف أومشكل ذهني أو أي بلوكاج مكيخليهومش يدوزو الامتحان بطريقة عادية فكيجيبو معاهم مرافق وكيكون عندهم امتحانات كتلاءم الحالات ديالهم .

وللإشارة، غادي تكون الدورة الاستدراكية نهار 29 و30 يونيو 2026، ونتائج نهار 9 يوليوز 2026، بعد المداولات المقررة يوم 8 يوليوز 2026.

مصدر الصورة