بركة عينو ف عمودية العاصمة الاقتصادية ورئاسة الحكومة.. بالترحال السياسي من أحزاب كان كيتشكا من ممارساتها "للبلقنة" وسرقة المنتخبين والفضيحة غايرشح كاع عضو فالمكتب السياسي للحركة الشعبية باسم الميزان .

مصدر الصورة

احمد الطيب كود الرباط ///

البارح فكازا، كان زلزال سياسي، واحد من الأعيان المعروف فالعاصمة الاقتصادية بكثرة التنقلات بين الأحزاب وكيطلق تصريحات مثيرة على مافيا العقار وكل مرة شابكها مع شي حزب، التحق رسميا بحزب الاستقلال، بحضور الأمين العام نزار بركة.

بركة، للي جا لدار شفيق البارح، رفقة قياديين بارزين، باغي كازا يسيرها الميزان، فحسب معطيات “گود” فالاستقلال عينو فرئاسة أكبر عدد من المقاطعات ويكون خلف للأحرار سواء فرئاسة الحكومة أو فرئاسة العمودية ديال العاصمة الاقتصادية.

كازا فيها أكبر عدد من المقاعد البرلمانية، لذلك بركة دار مناورة سياسية “غير أخلاقية” قبل أسابيع من موعد الانتخابات البرلمانية المقبلة، هاد المناورة الأخلاقية هي ضد شعارات “التخليق” ومحاربة البلقنة والفراقشية للي كيرفع نزار بركة براسو فكل نشاط او تصريح أو ندوة.

الاستقلال بقيادة عدد من رموزه اللي مبغاوش يتخلاو على مصالحهم وسط الجهة، سبق فجرو التحالف الثلاثي فعدد من الملفات داخل مجلس الجهة او المدينة (زلزال تفويت المرافق لي قسم الأغلبية) وباقي المدن، كيطمع في عمودية الدار البيضاء.

من ضربات الاستقلال لباقي الأحزاب، ماشي غير جاب الأعيان من الحركة الشعبية بحال شفيق للي هو باقي أمين جهوي لحزب الحركة الشعبية، بل استقطب رئيس مقاطعة من البام وجاب ناس آخرين من أحزاب اخرى باش يرشحهم، واش حزب الاستقلال مافيهش كفاءات ومناضلين قادرين ينافسو ولا ضروري من الترحال السياسي كآلية تسيء للعمل السياسي، تقول مصادر داخل حزب الاستقلال في حديثها مع “گود”.

شفيق راه سبق ف 2015 وصرح لـ”گود” بلي معندوش مشكل مع الترحال السياسي. كل مرة فين مرة البام مرة الحركة ودبا الاستقلال. واش هذا سياسي كيحترم تخليق العمل السياسي؟ وف نفس الوقت كيدعي أنه كيحارب لوبيات العقار. إوا شكون يحارب مافيا المنتخبين للي سدو الطريق قداك تجديد النخب بمشاركة الشباب والنساء وطاقات جديدة.