مسيرات الريزو ... شباب دواوير بوتفردة فإقليم بني ملال خرجو فمسيرة احتجاجية باش يطالبو بفك العزلة .

منذ

كود- بني ملال //

ساكنة دواوير جماعة بوتفردة لي تابعة لقيادة تيزي نيسلي، دائرة اغبالة، عمالة بني ملال خرجو فمسيرة احتجاجية اليوم الأحد 31 ماي على رجليهم قاصدين عمالة إقليم بني ملال، باش يعبرّو على الاستياء ديالهم من الظروف الصعيبة اللي كتعاني منها المنطقة، مني طالبو المسؤولين بالتدخل العاجل لحل مجموعة من المشاكل اللي كتشغل الساكنة.

ورفعو المحتجين مجموعة من المطالب اللي كتهم بالأساس تحسين ظروف العيش وفك العزلة على الدواوير التابعة للمنطقة، وكان من بين اهم المشاكل المطروحة ضعف وانعدام شبكة الهاتف والإنترنت، حيث أكدو أن هاد الوضع كيحرم التلاميذ والطلبة من الاستفادة من الوسائل الرقمية وكيأثر على الحياة اليومية ديال السكان.

مصدر الصورة

كما احتجوا على الحالة المكرفصة ديال الطريق لي كتربط بين تزكات وتاسنت، واللي وصفوها بالكارثية، كيف ما أكدو أنها كتصعب التنقل ديال الساكنة، خصوصاً المرضى والعيالات الحاملات الشي لي كيسبب فخسائر للفلاحين بسبب صعوبة نقل وتسويق المنتجات الفلاحية.

ومن بين الملفات اللي تم طرحها، مشكل الما الصالح للشرب، مني تشكاو المحتجين من الانقطاعات لي كتعاود وضعف الصبيب، خاصة ففصل الصيف، وطالبو بضمان التزود المنتظم بهاد المادة الحيوية ، كما اقترحو حلول عملية من بينها حفر بئر إضافية وتقوية شبكة التوزيع الحالية.

وأكد المشاركين على ضرورة إشراك الساكنة فمتابعة المشاريع التنموية وتدبير الشأن المحلي، واعتبرو أن التنمية الحقيقية كتبدا بتوفير البنيات التحتية والخدمات الأساسية.

مصدر الصورة