هرگاوا تسببو فأزمة د الما فالعيد الكبير. شنو ذنب البيضاوي اللي ما معيدش باش يعاني فهاد الصباح مع الما؟ .

مصدر الصورة

گود كازا//

متسببة عملية الذبيحة ديال العيد الكبير صباح البارح الاربعاء، فمشكل ديال الما بعدد من مناطق الدار البيضاء، وخصوصا عند الناس اللي ساكن فالطوابق الفوقانية ديال الموبلات بحال الكاطريام والسانكيام وانت طالع.

التهافت ديال واحد الفئة هركاوية على انها تذبح الأضحية ديالها فالزنقة وفالباركينگ د الموبلات والإقامات السكنية، وإسرافها فاستعمال الما، خلى الفئة اللي ساكنين فالطوابق الفوقانية تعاني بزاف صباح العيد الكبير لمدة 4 و لا 5 السوايع، وخصوصا اللي ما كايذبحوش او ما اللي ما بغاوش يذبحو هذا العام بسبب غلاء اثمنة الخرفان.

دابا الناس اللي ما معيدينش او اللي ما عندهمش مع هاد الطقوس ديال الذبيحة والعيد، شنو ذنبهم يبقاو بلا دوش هذا الصباح وبلا ما باش يغسلو، واش دابا هادي حالة؟ واش دابا هادي ماشي حگرا؟ راه هاد هرگاوا ديال اللهطة غير ما غاديين وكايتزادو وكايتسببو فمشاكل كثيرة فكل مناسبة، وهذا الشي من غير المناسبات بحال العيد الكبير، وكايضيقو على عباد الله عيشتهم بتهرگاويت وسلوكاتهم المتخلفة، وهذا الشي ما يبغيه لا الله ولا عبدو.

وا شنو ذنب واحد ما معيدش ولا ماشي مسلم گاع ويقدر يكون مريض من الفوق، فأنه يعاني صباح العيد الكبير مع الما ما كايطلعش له للطابق فين ساكن، ويبقى بلا دوش وبلا شقا فدارو، غير حيث شي وحدين معيدين وكايذبوح فالباركينگ والزنقة، وعاطيين للمياهات صلية وكون غير كانت شي نظافة، وهما اغلبهم كايخلي الدنيا مسخة وخانزة.

للإشارة فالسلطات فمدينة الدار البيضاء خصصت المجاز الحضرية لاستقبال اضاحي العيد الكبير باش بيضاوا يذبحو الحوالا فظروف نقية وتبقى المدينة نظيفة، ولكن الإقبال ضعيف، حيث هرگاوا ولوفر التجخمير والروينة والدميات.