ولاة تقاتلو باش الحولي ما يخطاش الرحبة. قنعو الكسابة يخرجو اللي عندهم وهزو فكاميوات للبلايص اللي فيها الخصاص .

مصدر الصورة

كود احمد الطيب ///

البارح واليوم عدد من ولاة الجهات ماشافوش النعاس. خدمو ليل ونهار باش ما يخطاش الحولي رحبة لغنم. الساعات الاخيرة قبل العيد لكبير غدا لاربعا عرفات بعض الاسواق خصاص كبير. فقد علمت “كود” ان اسواق بكليميم وصلها اكثر من 1200 حولي هاد الصباح باش تلقى الاسر اللي بقات حتى الاخر نهار ما تعيد. فجهة كازا كانت تعبئة كبيرة وصلات حتى اقناع الكسابة باش يخرجو اللي بقى عندهم للسوق. كان بعض الخصاص وخدمات السلطات باش تغطي على العجز.

فطنجة من الساعات اللولى من هاد النهار وصلو عدد من الكاميوات ديال الاكباش لاسواق الجهة خاصة طنجة باش يعوضو الخصاص، نفس الشي وقع فجهة سوس ماسة اللي كانت اسواق فيها ناشقة تقريبا من لحوالا.

فمراكش تهزو حوالا من اسواق كاينة فيها الوفرة لاسواق فيها خصاص باش كلشي يلقى باش يعيد.

طبعا الثمن طلع بزاف النهار اللخر. مثلا فمدينة صغيرة بحال ايفران وصل متوسط ثمن الحولي تسعين الف ريال حسب مصادر “كود”. هادي راها جات فمنطقة فلاحية ماشي بعيدة.

وزارة الفلاحة كتقول باللي كاينة الوفرة وما كانش الخصاص وباللي كانت سلوكيات اللي ضرات بالسوق.

الاشاعات مخلطة بالاخبار المزيفة خلات شي وحدين يهجمو البارح على لكوارا فشي بلايص بحال ليزاباطوار لقدام ديال كازا فالحي المحمدي وشي بلايص فبنسودة ففاس وفشي سوق فالداخلة.

الولاة حاولو ما يخواوش الاسواق. شي كباسة كانو ضد قرارات الحكومة وما بغاوش ينزلو سلعتهم. شي شناقة استغلو الفرصة وزادو رونو السوق. النتيجة هاد الشي اللي وقع البارح واليوم. دارت مجهوات باش ما يوقعش ما هو اخطر لحد الان. هادا درس كبير ايلى ما تعلمناش منو ضربنا تران العيد الجاي