باش تعرفو حقيقتو وما مسوق لوالو. سعد لمجرد محكوم ب5 سنين بالاغتضاب: بكى فالمحكمة بعدها خارج فرحان كيهدر على حفلات والعودة للمنزل و"جمهوري العزيز" .

هناء ابو علي كود – كازا //
مصدر الصورة

وسالت دموع النجم المغربي بعد إعلان الحكم في محكمة دراغينيان، وعانق زوجته وحماته. ومثل أمام المحكمة طليقا في جلسة مغلقة، ولم تُصدر المحكمة مذكرة توقيف بحقه. كما أمرت المحكمة المغني بدفع تعويضات قدرها 30 ألف يورو للشابة، بالإضافة إلى 5 آلاف يورو أتعاب محاماة.

هادي قضية ثانية كيتحاكم فيها بنفس التهمة ففرانسا. هادي كتهم سرباية فشي بواط رونوي تلاقاها فسان تروپي جنوب شرق فرانسا. القضية الاولى كانت مع شابة اسمها لورا كترجع ل2016 ليلة قبل سهرة كان غادي يديرها فباريس. القضية هادي تحكم عليه بباريس ابتدائيا ف2023 ب6 سنين.

تصورو بهاد الاحكام وبهاد التهم وبتمثيلية انو بكى فالمحكمة هادي 3 ايام، خرج بتدوينة كتشوكي. قال فيها “عائلتي احبابي وجمهوري العزيز اطمئنكم انني بخير والحمد لله. في طريقي للمنزل والعودة للعمل والتحضير للحفلات القادمة. نلتقي قريبا باذن الله”. ودار معاها صورة فرحان وكيضحك.

اش كيعني هاد الشي؟ انو ما كيشعر حتى بذرة ندم على افعالو اللي سبق وتابع بتهم الاغتصاب فامريكا ف2010 قبل ما يهربوه ويتمنع عليه يدخل ليها وفالمغرب ف2015.

واش هادا ميساج ديال شي حد نادم على افعالو. ما يقولش لي باللي القضاء ظلمو؟ ابدا محاكمة عادلة وتحكم عليه بافعالو.

القضاء الفرنسي ما حكمش عليه بسبب “إشاعة” ولا “ترند” الحكم جا بعد سنوات من التحقيقات والجلسات والاستماع.

فاش كتكون محكوم من طرف القضاء فقضية اغتصاب، وأول حاجة كتفكر فيها هي طمن الجمهور على الحفلات الجاية،يعني راه كاين خلل كبير فالإحساس والواقع وباللحظة،سعد معبرش على الندم ديالو او قال شي كلمة على الضحية، ولا اعترف بالدنب، و لا تواضع قدّام حكم قضائي خطير ، لي همو هو يرجع دغيا للحفلات بحالا اللي وقع غير “استراحة فنية ” .

ردة فعل سعد لمجرد بعد الحكم ومن بعد الإعلان على الحفلات، ماشي تناقض ولكن ميكانيزم دفاعي عند الشخصيات النرجسية ، اللي عندو هاد ردود الفعل ما كيشوفش المشكل كفرصة للمراجعة الداخلية، ولكن كيشوفها كهجوم على هويتو وعلى مسيرتو خصوصا الا كان بحال سعد ، اما ردو فعلو الغريزية هي طريقة التبرير والتجاوز بلا اعتراف حقيقي لي يقدر يخليه يحس بالهشاشة و الموت الرمزي.

مني كيتعامل شي حد عندو حضور جماهيري كبير مع حكم قضائي فجريمة اغتصاب بهاد اللامبالاة، راه ما كيتجاهلش الضحية بوحدها، ولكن كيرسّخ فوعي ملايين المتابعين ديالو واحد المعادلة ديال ان الموهبة فوق المسؤولية، والشهرة كتعطي لمولاها الحق يفلت من المحاسبة، وهاد المعادلة بالضبط هي اللي كايخلّي بزاف ديال العيالات يخلّصو الثمن بلا ما يبلّغو على الجريمة.