معنديش مع عبديلاه مول الحوت، ومعنديش مع كيفاش كيهدر وكيفاش كيتمشى وكيفاش كيفكر وعلاش كيعبر، ومعنديش مع الناس لي كيتفرجوا فيه ومع ذلك أنا ضد أنه يتحكم عليه بعدم استعمال وسائل التواصل لخمس سنوات، هذا قانون يليق بكوريا الشمالية .

مصدر الصورة

محمد سقراط-كود///

معنديش مع عبديلاه مول الحوت، ومعنديش مع كيفاش كيهدر وكيفاش كيتمشى وكيفاش كيفكر وعلاش كيعبر، ومعنديش مع الناس أي كيكونوا حداه ولي كينفرجوا فيه ولي كيتيقوا في هدرتو، ومع ذلك أنا ضد أنه يتحكم عليه بعدم استعمال وسائل التواصل لخمس سنوات، هذا قانون يليق بكوريا الشمالية أو افغاتستان أو كمبوديا أيام الخمير الحمر أو الجزائر، مايليقش بدولة بحال المغرب كتعيى تسوق راسها أنها ماشي بحال لخريين لي حداها، عبديلاه استهزء بأستاذ ديالو، ناض الأستاذ وهادشي لي كنتسناو منو دعاه، المنطق هو الحكم يكون غرامة او سجن او تعويض مادي او هادشي مع بعضياتوا، ومنع التعرض للأستاذ في مواقع التواصل مايجبدو مايهدر عليه، ماشي منع مواقع التواصل خمسنين، هذا راه حكم ديال الدول الشمولية من هادي للغولاك.

الموشكيل هو بنادم فرحان للحكم ومكرهتش يتحكم على گاع الناس لي كيدخلوا الفلوس من الانترنيت بلا تمارة ومكيتسناوش راس الشهر ويفيقوا مع السبعة، وكيشجعوا على حملة تديرها الدولة لتطهير الويب المغربي، بحال داكشي ديال تطهير الخمير الحمر لكاع المثقفين والقاريين في البلاد، او تطهير ستالين للمعارضين او تطهير المانيا من خوتنا ليهود لي دار هتلر، راه هادشي يقدر يبدى ليوم من الناس لي معندكش معاهم ولكن غدا يقدر يوصليك، شكون لي عندو ضمانات فين غادي يوصل هادشي، الدولة ماشي من حقها تدخل في منع شي حد من مواقع التواصل، هاد المواقع لي عندها الحق توقف المحتوى ديال شي حد الى خالف قوانين النشر.

عبديلاه ارتاكب جريمة ضد واحد الشخص ودعاه، المحكمة والقانون خاص يتدخل بين عبديلاه والضحية، ماشي بين عبديلاه والأنترنيت كامل، هذا راه نفي رقمي أو قتل رقمي لمدة خمس سنوات، راه مكاينة حتى فشي دولة كتحتارم راسها، هادو أحكام ديال الدول الشمولية، وكي غادي تدير الدولة أصلا تفرض هاد المنع، وفي حالة محتارموش كيفاش غادا تعاقبوا، راه حكم غير منطقي والى ستاند على شي قانون راه خاصوا يتبدل، الحرية هي أسمى حاجة في الوجود من المفروض من القانون يحميها ماشي يقمعها.