تصريح مهين للمغاربة. بركة للي كيروج انه غايكون رئيس حكومة 2026 قال فلقاء حزبي بلي همو غير يجمع المقاعد: مكاين لا كفاءات ولا تجديد النخب ولا خدمة المواطن .

مصدر الصورة

كود الرباط//

قبل اشهر قليلة من الانتخابات التشريعية للي غاتحدد حكومة المونديال، جزء من النخبة السياسية والحزبية باقي كتعاود نفس الاخطاء سواء من خلال تزكية نفس الوجوه للي عمرت طويلا ف البرلمان، او من خلال تصريحات مهينة ف حق الناخبين المغاربة.

فبعدما خرج ادريس لشكر لاليست ديال الوكلاء لوائح حزب الاتحاد الاشتراكي للانتخابات المقبلة وللي عامرا بوجوه قديمة ومنهم لي باقي عندهم متابعات قضائية، وطبعا بحال السلوكيات لي كيتنفر المواطنين من المشاركة المكثفة في العملية الانتخابية، موراه جا تصريح مهين ديال زعيم حزب الاستقلال نزار بركة فلقاء حزبي.

فالوقت اللي كيتسناو فيه المغاربة برامج سياسية واقعية تخرجهم من أزماتهم الاجتماعية والاقتصادية، بركة، الأمين العام لحزب الاستقلال، عطا تصريح كيختزل العمل السياسي في عملية حسابية جافة “نجمعوا المقاعد”.

هاد التصريح ماشي زلة لسان، ولكن كشف حقيقة هاد الحزب للي كيتحرك غير فاش يقربو الانتخابات وكيمارس المعارضة غير ف العام الاخير عمر الحكومة لي كيشارك فيها.

تصريح كشف العقيدة السياسية التي تحرك الحزب في أفق استحقاقات 2026 و2027، حيث مبقاتش خدمة المواطن ومحاربة الفساد والتشغيل ووو، بركة ولى مهوس بالأرقام، باغي يجي لول بزز.

زعيم حزب عريق، كيطمح لرئاسة الحكومة من حقو، ولكن باش كيهين المغاربة بترسيخ صورة نمطية سلبية عن العمل الحزبي في المغرب، كأن صوت المواطن بحال “نفايات” يتم جمعها لتعبئة رصيد المقاعد، وبحال “بضاعة” تُشترى بوعود براقة لخدمة طموحات شخصية أو حزبية ضيقة.

بركة لي باغي يجمع المقاعد فهاد الانتخابات البرلمانية هاد العام والانتخابات الجماعية العام جاي، كيصطدم بواقع تنظيمي مأزوم كيعيشو حزبو “الميزان”. هاد الحزب فشل حتى الآن في تدبير بيته الداخلي، حيث تسود حالة من التخبط في حسم تزكيات وكلاء اللوائح في حواضر كبرى ومدن استراتيجية مثل طنجة وأيت ملول .

الصراعات حول التزكيات كشفات فعلا أن المعيار ليس دائماً الكفاءة أو القرب من المواطن، بل الولاءات والقدرة على “جمع الأصوات” بأي ثمن، وهو ما يفسر تصريح بركة المثير للجدل. يعني بركة كيقوليهم : مكاين لا تشبيب ولا كفاءت، للي قادر يجمع المقاعد مرحبا به.

المغاربة محتاجين برامج حقيقية وحلول لغلاء المعيشة، للبطالة، ولتدهور الخدمات الصحية، وضعف جودة التعليم.. هادشي ماشي اولوية بركة، حيث بتصريحو كيوضح ان الاولوية هي المقاعد باش يبقا المغرب “لنا ولا لغيرنا” وفاء لشعار فاسا الاستقلال التاريخي.

يشار بلي بركة دارت تصريحات قبل مناقشة الحصيلة الحكومية، كيقول بلي الحكومة فشلت ف التشغيل وف محاربة الفساد والفراقشية، ونسى بلي مسؤولية التشغيل الكبيرة راه كتهم قطاعو ديال التجهيز للي خصو يوفر فرص شغل كثيرة، وزيد عليها قطاع الصناعة والتجارة للي هو اهم قطاع مور الفلاحة ف توفير فرص الشغل، هاد القطاع كيسيرو رياض مزور، فشل فشل ذريع فيه. كاع انجازات مولاي حفيظ العلمي بغا يركب عليها.