كيفما ماشي أي مسلم إرهابي راه ماشي أي يهودي إسرائيلي أو مساند للحرب في غزة أو شارك فيها گاع، حاليا كاين موجة كبيرة ديال معاداة السامية وخصوصا في الدول الإسلامية ماشي كلها طبعا، حسب الضجة لي ناضت على خوتنا اليهود لي صلاو في باب دكالة بمراكش، هادوك ناس جايين من ميريكان كيديرو السياحة الدينية في المغرب، الأولياء والصلحاء ديالهم مدفونين في هاد الأرض الطاهرة، مابينهم وبين إسرائيل والو، ومع ذلك كولشي كان كيسبهم بقتلة الأطفال والابرياء ويتاهمهم بالمشاركة في حرب غزة، علما أن بزاف منهم يقدرو يكونوا ضدها وضد إسرائيل كلها كدولة، هاد جميع اليهود في قفة وحدة عادي عند الكوفيين وبزاف ديال المغاربة، بينما فاش كيجمعنا شي واحد كاملين تحت يافطة الإرهاب والتشدد كنعتابروها اسلاموفوبيا وعنصرية.

كاين منشورات كثيرة تدعوا للإعتداء على اليهود وتطهير الأرض منهم، وكاين موجة عداء كبيرة يمكن تشمها في الهوا، وهي حاجة عادية من ورا الحرب في غزة وكيفاش الاعلام الناطق بالعربية كيسوقها، ولكن أن الدولة تميك على هاد الرسائل العدوانية والمنشورات والتحريض الممنهج ضد خوتنا اليهود راه ماشي معقول، وعادي أننا نسمعوا شي نهار شي اعتداء على اليهود او الأجانب في المغرب، راه تعيى المخابرات المغربية تحضي وتدير عمليات إستباقية غادي يفلت شي حد ويدير كارثة، خاص تجفيف منابع الإرهاب والتطرف بحال لي دار بنسلمان في السعودية، أي خاص الدولة تبدى من دعاة التطرف في الانترنيت ومواقع التواصل، هادو لي كيأثروا ويشحنو المغاربة بالكراهية والتطرف.

من ورا أي حرب في الشرق الأوسط من غير حروب المسلمين بيناتهم، كتزاد معاداة السامية في المغرب وكيتزاد التخونيج والتشدد والتطرف، وماشي المغرب استثناء هادشي كيوقع في العالم، الموشكيل هو في المغرب ولحد الآن الدولة مخلية المتشددين واخدين راحتهم في مواقع التواصل وفي الساحات العامة، حرق راية دولة سواء صديقة او عدوة راه ماعندو معنى كيف ماحنا منقبلوهش على رايتنا خاص يتمنع يتدار لراية الدول الأخرى، حاليا كتحرق غير راية إسرائيل غدا يجيك واحد باغي يحرق راية إسرائيل وميريكان حيت صحاب، بعدو يجيك واحد آخر باغي يحرق راية إسرائيل وميريكان والامارات والسعودية، إيوا شتي فين ولينا، بالاظافة الى كاين تعليقات كثار ماليها معروفين وفيها تخريض واضح ضد اليهود، ليوم الكراهية باقا في المواقع غدا تقدر تمتد للواقع، وما قربالة لي ناضت على باب دكالة غير تعبير وتجلي لكراهية اليهود أيا كانت جنسياتهم واخا يكونوا مغاربة.