هاعلاش الراية ديال إسرائيل كانت حاضرة فالنشاط المدرسي ”فگاع اسراس“ فإقليم شفشاون .

كود- طنجة //

قالت مصادر تربوية فالمديرية الإقليمية ديال وزارة التربية الوطنية فشفشاون لـ”گود”، بلي الصور اللي دايرة فالسوشيال ميديا واللي فيها رايات دول أجنبية، ولي من بينها درابو “إسرائيل”، وسط مؤسسة تعليمية فقاع أسراس، كتهم نشاط مدرسي وسط برنامج سميتو “نموذج الأمم المتحدة‘‘.

وفسرات نفس المصادر بلي هاد النشاط هو ورشة تعليمية دولية، الهدف منها هو تدرب التلاميذ على كيفاش يديرو الترافع الدبلوماسي وسط أجهزة الأمم المتحدة، وحسب القوانين ديال هاد البرنامج، خاص المشاركين يمثلو دول مختلفة ويناقشو قضايا ديال السلم والأمن الدولي، وأن هاد النشاط ما عندو حتى طابع سياسي خارج الإطار التعليمي.

مصدر الصورة

وحسب نفس المعطيات، النشاط كان فالثانوية التأهيلية قاع أسراس نهار 24 و25 أبريل، وشاركو فيه تلاميذ من 3 مؤسسات تعليمية، كل واحد فيهم خدا دور ديال دولة معينة فمجالس افتراضية بحال مجلس الأمن ومجلس حقوق الإنسان.

وزادو قالو بلي موضوع “اسرائيل وفلسطين” كان من بين أهم المواضيع اللي تناقشات بين التلاميذ وعلى طرق تحقيق السلام، هاد الشي هو اللي كيشرح علاش كانو الرايات ديال الدول المرتابطة بهاد النزاع، حيث ضروريين فهاد النوع ديال الأنشطة باش يعطيو صورة قريبة من الواقع ديال اجتماعات الأمم المتحدة.

مصدر الصورة

وفنفس السياق، شددو المنظمين بلي هاد النشاط كيدخل فإطار تفعيل خارطة الطريق 2022-2026، اللي الهدف منها هو توسيع آفاق التلاميذ وتنمية مهاراتهم فالحوار والتفكير النقدي، كيف ماقالو بلي التركيز غير على مسألة الراية الاسرائيلية تفسير ناقص، حيث كيخلي الناس ميركزوش على الهدف الحقيقي من النشاط، اللي هو تكوين جيل قادر يفهم العلاقات الدولية ويدافع على القضايا الوطنية فالتجمعات الدولية.