التعاونيات ديال الزيت البلدية ولاو كينافسو الشركات فالدورة 18 ديال المسابقة لي كينظمها SIAM .

مصدر الصورة

كود -مكناس//

فالدورة 18 ديال الملتقى الدولي للفلاحة (SIAM)، احتافل المغرب بأحسن منتجين ديال زيت الزيتون واللي جاو من خمسات الجهات مختلفة.

ترأس هاد النشاط وزير الفلاحة أحمد البواري، ومعاه عامل مكناس ورئيس جمعية الملتقى، فالأخير توجو 12 المنتوج من 3 جهات مغربية، وهاد الشي كيعكس التطور الكبير اللي عرفاتو صناعة زيت الزيتون فالمغرب، سوا من ناحية الجودة ولا التنافسية.

المسابقة تنظمات بتعاون مع مهنيي القطاع، واعتمدات على معايير دولية ديال المجلس الدولي للزيتون، باش تكون النتائج شفافة، المسابقة شارك فيها 77 واحد من خمسات الجهات، وتنافسو فـيها 4 فئات مختلفة ديال الزيت: المجهدة، المعتدلة، الخفيفة، الحلوة.

ففئة النكهة المجهدة خدات جهة فاس-مكناس المراتب الثلاثة اللولين كاملين مني جات شركة OLIVEINVEST فالمرتبة الأولى، وشركة CHANIA الثانية، وشركة OLEA CAPITAL الثالثة، وهاد الشي كيبين باللي الجهة باقا محافظة على النوع ديال الزيت الخضر المجهد اللي معروفة به.

أما جهة مراكش-آسفي فربحات حتى هي المراتب الثلاثة اللولين ففئة النكهة المعتدلة، بشركة D’EXPLOITATION DE L’OLIVE فالمرتبة الأولى، وشركة OLIVE OIL CARTEL فالثانية، ومعصرة بن ملوك فالثالثة وهادشي راجع لطبيعة الارض لي كتعرفها الجهة خصوصا العطاوية وقلعة السراغنة.

أما ففئة النكهة الخفيفة خدات فاس-مكناس المرتبة الأولى من معصرة إبراهيم الزنيبر، اما مراكش-آسفي جاو التانيين والتالثين .

وبالنسبة لفئة النكهة الحلوة، خدات جهة بني ملال-خنيفرة المرتبة الأولى بفضل تعاونية آيت أعتاب، وموراها جات شركة مراكش الثانية والثالثة.

فهاد الدورة كان الحضور القوي ديال التعاونيات الفلاحية، اللي ولات كتدخل بقوة فالمنافسة وكتحقق نتائج مزيانة، بحال تعاونية زيوت الصويرة وتعاونية التيسير جوج من جهة مراكش-آسفي، وهاد الشي كيبين أن الفلاحة الصغار ولات عندهم فرصة حقيقية باش يبانو فالسوق.