لاكان داك برنامج لالة العروسة عندو شي فايدة فراه هي كايوريك بالملموس أن المغاربة مساكن مازال كايتجوجو زواجات عوجين ماعندهم لا ساس ولا راس! لا نضح، لا احترام، لا أخلاق، بنادم غا تاكينوض يجري يهز مشموم ديال النوار ويگيد مّو تخطب ليه.

الكوبل ديال طنجة نموذج من نماذج الجواج الاعوج لي كاينين وكثار فالمغرب، درّي صغير، فقير عاش حياتو كاملة فالجمعيات، مازال محتاج الرعاية النفسية ومازال محتاج يتعالج من الصدمات والجروح ديال الطفولة القاسية لي عاش، غايتربّط ببنت لي حتى هي مازالة صغيرة وحتى هي كايبان عليها أنها شبعانة عقد ومشاكل نفسية ماكاتأهلهاش حتى تتصاحب فما بالك أنها تزوج و تبني أسرة… جوج ديال الوليدات صغار، خاصهم بجوج واحد سنين ديال العلاج النفسي يعرفو راسهم بعدا شكون هوما … عوض يقصدو البسيكولوگ قصدو العدول، وهادي راه هي القصة لي ورا أغلب الجواجات فالمغرب! وكوبل طنجة طبعا راه للمثال وليس الحصر…

ولكن المشكل الكبير هنا هوا أنه هاد الجواجات العوجة، كاتخرج على السيطرة وكان وليو نشوفو ممارسات ماخاصهاش تدوز فالتلفزة الرسمية وحتى اذا دازت خاص يكون موراها درس وعبرة للمشاركين وحتى للمتسابقين. كيفاش الأولى تسمح بمشاهد ديال مرا كاتسلخ راجلها وكاتعايرو؟ كيفاش الأولى تسمح بمشاهد فيها استصغار وتطبيع مع العنف وشي هضرة فحال “راجلي من حقي ندير فيه مابغيت” “راجلي كانضربو على مصلحتو” “راجلي غانكون فرحانة اذا ضربني حيت عارفاه ضربني على مصلحتي”

“راجلك ديري فيه مابغيتي ولكن ماشي قدامنا” اجلك ضربيه ولكن فبيتكم” “فاش كايكون الراجل هوا لي كايضرب المرا كانقولو الله يهديه” …. وا عباد الله راه خاص ادانة واضحة للعنف! راه خاص البرنامج يحبس ويعيطو على ديك برانسيسة وعماد ويجلسوها ويقولو ليها وا لالة الشريفة راه ماخاصكش ضربي راجلك! راه جريمة! راه العنف الزوجي هاداك راه ماشي حرية شخصية !

الهاكا خاصها تتدخل ففحال هاد الأمور الخطيرة، واش الهاكا ناعسة ولا شنو؟ الدنيا مقربلة والهاكا والأولى ساكتين كايساينو العاصفة دوز والناس ينساو! صافي باراكا علينا أجيال ديال المغاربة المعطوبين نفسيا بسباب العنف الزوجي، باراكا من هاد الحقارة وهاد الرخص! لي طرا فلالة العروسة راه جريمة والسكات عليها راه فحالا الاولى كاتقولينا بلي العنف حاجة عادية جدا وخاصنا نطبعو معاها.