غير بـ3 أورو.. تسهيلات جداد للمغاربة فصبليون باش ياخذو شهادة حسن السيرة...واش غايبقاو القنصليات خدامين هكا ديما ولا غير حيت تفتح القانون ؟ .

مصدر الصورة

كود -سبتة//

القنصليات المغربية فإسبانيا تسربسات هاد السيمانات مع المغاربة خصوصا الحراگة لي بغاو يريگلو لوراق، و فهاد الإطار المديرية العامة للأمن الوطني بتنسيق مع وزارة الخارجية خدمو على تسهيل المساطر، وولا ممكن دابا باش تاخد شهادة حسن السيرة ديريكت من القنصليات بلا ما تحتاج تمشي للمغرب، هاد الخطوة سهلات بزاف على الجالية وخففات عليهم التعقيدات اللي كانت من قبل، خصوصاً فظل استفادة كثر من 90٪ من طالبي هاد الوثيقة فالفترة الأخيرة.

الورقة اللي كانت كتكلّف حتى لكثر من 200 أورو وكتطلب وقت طويل، ولات دابا غير ب 3 أورو ديال التنبر، وكتتدار دغيا، وزادت القنصليات خدامة حتى فالويكاند وطلعات سوايع الخدمة لــ6 ديال العشية، باش يتخدمو 300 ملف يومياً، مع تسجيل أكثر من 500 عملية سحب ديال الوثائق اللي واجدة، وحسب المعطيات نسبة كبيرة من المغاربة فإسبانيا بداو كيستافدو من هاد التسهيلات اللي اعتابروها خطوة إيجابية.

فـمايوركا القنصلية العامة ديال المغرب خدامة على تقريب الخدمات للجالية، وهاد الشي جا تنفيذاً للتوجيهات الرسمية باش يتحسّن التعامل مع مغاربة الخارج، هاد السياسة خلات المواطنين يستافدو من خدمات إدارية فظروف حسن، خصوصاً فهاد الفترة اللي فيها طلب كبير على الوثائق، حيث كيتسجل ارتفاع فعدد الطلبات بنسبة فاقت 70٪ فبعض الأيام.

أما فـإيبيزا، مشات قنصلية متنقلة باش تقرّب الإدارة من المغاربة اللي عايشين فـ جزر البليار، ولي كتخدم حتى السبت والأحد، اختيار إيبيزا جا حيث فيها عدد مهم من المغاربة اللي كيتقدّر بالآلاف، وعندهم حضور قوي فالحياة الاقتصادية والاجتماعية والسياحية، وكيشكّلو واحد من أنشط الجاليات فهاد المنطقة.