علاش الدولة المغربية واخا كتباهى بمية قرن ديال الحضارة ( شاد الحساب من أيام جدنا إيغود) ماقدراتش تخرج مواطن متمدن حضاري؟ .

مصدر الصورة

محمد سقراط-كود///

علاش الدولة المغربية واخا كتباهى بمية قرن ديال الحضارة( شاد الحساب من أيام جدنا إيغود) ماقدراتش تخرج مواطن متمدن حضاري، حتى في الرباط العاصمة ولي تعتبر أكثر مدينة حضارية في المغرب، باقي السائقين مميوقفوش لناس لي محتارمين القانون وقاطعين من ممر الراجلين، بل كاين شي ممرات الراجلين يعتبر قطع الشارع منها بحال عملية انتحار، واحد ممر الراجلين كيربط بين مصحة اكدال ومدخل الپارك ديال الحسن التاني، في منطقة راقية وجنب شالة والقصر، والبنية التحتية مصلوحة ولكن بنادم ممصلوحش، واخا هو الحقيقة تم خاص يكون ممر على شكل قنطرة للراجلين فوق داك الطريق، بحال لي كيديرو في آسيا، خلي الزبل لي كيتلاح في الشارع، الرباط نقية بسباب عدد عمال النظافة الكبير لي كيخدم ليل ونهار، ماشي بسباب ماليها، يتطلق فيها اللعب شي عام تولي بحالها بحال فاس او مكناس أو غير كي كانت هي نيت في الالفينات، أو تولي بحال سلا راها غير حداها بيناتهم فير قنطرة.

فاش كيدير شي مراهق او طفل شي سلوك هرگاوي أول تساؤل كيطرحوه العباقرة هو فيناهو دور الأسرة، ولكن راه الأسرة براسها ممربياش والاسرة راه مكونها تفس داك المراهق من بعد عشرسنين، راه ماشي غير كتزوج وتولد وتكون اسرة ممتبقتش هوگاوي تلقائيا، راه العكس كتكون هرگاوي غير بوحدك كتلاقى مع هرگاوية كتولدو طاشمة ديال هرگاوة، وهاد الأسرة ماشي نتاج الفراغ جات من والو، راها نتاج الدولة للأسف المسؤولة الأولى على إنتاج هرگاوة، وللأسف شادة تحديث المجتمع المغربي بالمقلوب، كتظن أنه الى دارت الطارو دالزبل في الشارع راه المواطن تلقائيا غادي يلوح فيه الزبل بحال الى مبرمج، بينما الواقع وشنو كاين تيت في الدول المتحضرة، خاص تدير الطارو دالزبل وتدير قانون كيعاقب لي مالاحش فيه الزبل وتدير آليات لتفعيل هاد القانون، ومن بعد جيل أول جوج غادي يولي سلوك عادي مدمني ومتحضر أنك تلوح الزبل في الطارو ديريكت، أنك تقطع الطريق من ممر الراجلين أنك تحتارم قانون السير، أنك تكون متمدن، راه المدن حاجة قديمة في التاريخ ماشي عاد جديدة، بينما شوارع المغرب راه بحال الادغال رغم التقدم والبنية التحتية.

شوف طنجة مثلا مدينة صناعية تاريخية تعاقبت عليها الحضارات ديال بصح، الاخبار اليومية لي كتوصل من طنجة هي حوادث السير بالانواع والاشكال، مثلا كل نفق في المدينة في المدخل ديالو بلاكة ديال ممنوع الدراجات النارية الصغيرة، يوميا كاين كسايد ديال هاد الدراجات، بل كاين فيديوات عبثية بحال ديال آخر كسيدة في نفق رياض تطوان، ماتوا جوج شباب اابوليس كاين والجوقة مجموعة وصحاب الماطر باقين دايزين ممسوقينش، كذلك الطريق السيار ديال كازا ها الماطر شينوا ها الطريبورطور، داك النهار عاد ماتت مرة كبيرة كانت راكبة طريبورطور في لوطوروط، هاد السيبة والعبث جاي من الدولة ماقادراش تطبق القوانين، راه لا قيمة للقانون المكتوب الى مكانش غادي يتطبق كيبقى غير نص وصافي، الدولة هي لي عندها السلط والمؤسسات، التعليم والدين والبوليس والعدالة ونظام السجون والعقوبات والغرامات، راه يحز في النفس انه تبقى بلادنا متخلفة سلوكيا بحال هاكا وأجيال كتضيع هايمة في الشوارع لا قراية لا ترابي.