كعكة “جيتيكس إفريقيا 2026” مشات للوبي اللي كان مسيطر على الصفقات المليارية ديال تنظيم التظاهرات الكبرى، وعلى رأسهم شركة “أفونسين” (Avant-Scène) ديال ميريام أبيكزر، هاد اللوبي راسو هاد المرة خارج اللعبة وضربو تران، بعدما دازت الصفقة للمنافس اللدود لها
شركة “JETSET EVENTS” ديال زياد الخالدي.
طاح “لوبي” وطلع “العدو ديالو”

هاد التحول جا من بعد “الزلزال” اللي ضرب وكالة التنمية الرقمية (ADD) العام اللي فات، وسالا بإعفاء المدير العام السابق محمد الإدريسي الملياني. الملياني طار من كرسيه بسباب “الحرب” اللي نوضاتها مقالات صحافية ومن بينها “كود”، فاش تفضحات كواليس صفقة 2025 اللي كانت مخيطة على المقاس، وكيفاش لجان التقييم دوزات ملفات ديال مئات الصفحات فقل من ساعة باش تعطي المارشي لـ “أفونسين”.

اليوم، امين المزواغي المدير الجديد اللي جا من وكالة تابعة للأمم المتحدة المعروفة بالحكامة، كيقولو عليه جا ينقي الإدارة من “التبزنيس” فالمواصفات التقنية، جيتيكس هاد العام كان اول امتحان لها.

“جيتسيت” (JETSET) ديال الملايري الخالدي، خدا صفقات كثيرة مع وزارة الثقافة من مهرجان ربا افريكا، دخلات هاد العام بقوة وخدات مارشي واصل لـ 14 مليار سنتيم، بعدما كانت الصفقة العام اللي فات ب 12 مليار ونايضة عليها قربالة بين الشركات.

مارشي “العرض الوحيد” ولغز التسريبات

ورغم أن شركة “JETSET” عطات عرض تقني قوي، وفق مصادر “كود”، وحتى فالتنفيذ، بنات 100 ألف متر مربع ديال الخيام فـ 29 يوم وب 700 مستخدم، إلا أن طريقة تدبير المارشي ديال جايتيكس خصو مزال يتطور ويخضع لحكامة مالية وتقنية.

العام لي فات كانت افون سين، دارت ميسا فالمارشي بعدما تلغى وتعاود باش تربحو.

أكثر من هادشي، كاين كلام ف الكواليس على “شبهات تسريبات” بين موظفين وبعض وكالات التواصل. واش كاينين موظفين وإداريين فـ (ADD) باقين كيسربو “الدطاي” ديال الصفقات لشي شركات قبل ما تخرج للعلن؟ هادشي اللي كيخلي شي شركات توجد ملفات تقنية مطرطقة فظرف قياسي، بينما المنافسين الآخرين كياكلو الدق وكيتم إقصاؤهم بـ “أخطاء تقنية”.

المؤكد هو أن “أفونسين” اللي كانت “مدللة” الإدارة فالعام اللي فات، تكركبات هاد المرة، والمنافس ديالها خدا المارشي وبثمن كبر، فالوقت اللي كيتسناو فيه المهنيين تدخل حقيقي ديال المجلس الأعلى للحسابات باش يحقق فهاد “السيبة” ديال الصفقات اللي كترسى ديما على “الشركة الوحيدة المؤهلة”.