علاش ما يحيدوش الانتخابات فالباطرونا. مهدي التازي رئيس قبل ما تبدا الحملة. هاد الفاشل كيگول ليهم راه الفوق قبلوني .

سعيد الشاوي كود كازا ////

مصدر الصورة
دابا علاش تصلح الانتخابات ايلى ما كانش منافسة ديال بصاح. رئاسة الاتحاد العام لمقاولات المغرب منظمة ديال الباطرونا، عندها انتخابات وغادية تختار فالجمع العام ل14 ماي اللي جاي فالجمع العام العادي. غير الاختيار راه تحسم.

مهدي التازي نائب الرئيس الحالي للباطرونا هو اللي غادي يكون. قلنا يكون ماشي ينجح. صحاب لفلوس تلقاهم ينتاقدو السياسيين وهما اكبر جبناء. حتى اختيار رئيس ديالهم ما يقدروش يديروه الا ايلى جاهم شي وحي من شي جهة.

حسب شهادات “كود” فالتازي كيقول باللي حسم المعركة قبل ما يبداها وباللي عندو دعم كلشي. غير هاد كلشي ما عرفناهاش. خاص يكون عندو دعم رجال الاعمال وخاصة ديال الشركات المتوسطة والصغيرة ماشي الشركات لكبار وغيرها.

هاداك الاعلان للي دارو فحسابو باش قال وهو كيتفلى على لمغاربة باللي “”بحماس كبير وإحساس بالمسؤولية، قررت نترشح لانتخابات رئاسة الاتحاد العام لمقاولات المغرب”.

وبرر هاد الشي بغى يواصل الالتزام بخدمة المقاولة المغربية ولمؤسساتنا” طبعا هاد الشي غير كذوب. اللي خلاه يكون تماك مصالحو الشخصية. هاد الشخص كان خدام ف”ساهام” مع مولاي حفيظ العلمي وعطى مارشيات لمنصف بلخياط ودار معاه البيزنس والمقابل كان بلخياط عطاه شي جامعة ديال “الرياضة للجميع”.

هادي بوحدها توريكم رغبة هاد التازي ومحركو هو يدير البيزنس ويبان.

هاد التازي كان نائب لشكيب لعلج اللي ما قدرش يحل على مشاكل البيزنس ديالو فشركة الاشغال العمومية اللي دارها وفشلات ودارت احتجاجات من مقاولات متوسطة وصغيرة خدمات معاه وما خلصهاش. كيفاش رئيس الباطرونا فاشل فالبيزنس. هادي خصوصية تلقاها غير فبلادنا.
مصدر الصورة
دابا جابو هاد المهووس براسو وما غادي يدير والو للمقاولة المغربية. غادي يدير لراسو وللي حطوه تماك