من غير ظاهرة اقتحام القاصرين لسبتة ومليلية، ومحاولتهم اليومية للهجرة بأي طريقة من مغرب الأوراش الكبرى والرعاية الاجتماعية، كاين ظاهرة ديال أباء مغاربة خدامين مزيان وكتعطاهم الفيزا وكيمشيو لإسبانيا يسمحوا في ولادهم القاصرين تما ويرجعوا، بحال الأستاذ لي شدو مؤخرا ولي كان سمح في ولادو العام الفايت، هادو من المفروض أنهم أبناء الطبقة الوسطى وحتى هوما كيشوفوا الحياة في الخيرية في اسبانيا حسن من الحياة كأبناء طبقة وسطى في المغرب، ومن غير الآباء لي كيسمحوا فيهم في أوروبا، راه بزاف منهم كيقريوهم هنا ويزيدو ليهم السوايع ويتاقتلوا معاهم باش يدخلوهم لمدارس الطب والهندسة باش يقراو ويشدو شهادة تأهلهم أنهم يهاجروا لأوروبا، وخصوصا أبناء الطبقة الوسطى لي تقاتلوا في القراية ومعندهم حتى امتيازات هنا، في اللخر راه نفس النتيجة والرغبة لي عند شاب ماقاريش فقير من شي بادية نواحي سوق السبت هي لي عند ولد او بنت الأستاذ لي دارت الطب او الهندسة وعندها مستقبل نوعا مع في المغرب ومع ذلك أوروبا كتبقى هي الحلم لي جامعهم.

شنو قيمة الخدمة والأمان الوظيفي والطوموبيل والدار وهو أي بنت في المغرب ماتقدرش تلبس شورط قصير وتخرج تجري في الغابة بحال أي بنت في أوروبا، أغلب البنات لي قاريات وخدامات مزيان راه عايشين حياة بحال الحبس في المغرب معندهمش حق نهائيا في الفضاء العام أو النقل العام، أي وحدة خدمات خاصها تشري طوموبيل ضروري كوسيلة حماية وعزل أكثر مما هي وسيلة نقل، ومكتستافد حتى من شي خدمة عامة كتبرر الاقتطاعات الضريبية لي كتخلص كل شهر، وحتى الأنشطة الحياتية لي يقدر يدير الواحد شناهي؟ يمشي لقهوة للمول يجرب مطعم جديد يضارب مع الگارديانات يحضي من مالين الماطر، يطلع الزاج فاش يوقف في الضو حمر، لا حفلات موسيقية لا متاحف تستحق الزيارة لا فعاليات او أنشطة في الفضاء العام، خدم جمع الفلوس الى بغيتي تعيش الحرية وتتفسها خاصك تسافر برا المغرب، تمشي تدير لجوء انساني واحد السيمانة في العالم الحر، ولكن علاش مايكونش داكشي هنا.

جرب غير تكون عندك هواية في المغرب ختار بعشوائية أي هواية غادي تلقى مئات التعقيدات تكرهك فيها، مثلا باغي تصيد بالكاياك وتدير محتوى وتسافر في شواطئ المغرب وتبات فيهم، أسيدي عندك الفلوس والامكانيات وكولشي، غير توقف حدى البحر يوقفوك عليك المخازنية، ممنوع تبات ممنوع تدخل الكاياك هنا ممنوع تدوز من لهيه، أرى لاكارط منين جيتي فين غادي، هادشي وقع ليا أنا نيت كنت غادي فير نعوم في شاطئ تيبودة نواحي الناظور، عطيت لاكارط وحليت الكوفر ومنين غادي وفين جاي، بحال الى غادي نعوم في مضيق هرمز، جرب الرسم الگيطار الموسيقى واخا تحتارف مثلا بحال طوطو راه كل مرة في دعوى، جرب تدير فيديوات وتهدر بحرية تولي غادي جاي للحبس بحال المالكي، وجزب تسافر قانوني غادي تلقى الباسبور كيديك غير للدول لي قود منك او لي خاصك ليها مليون دالمركوب، راه عادي ناس من الطبقة الوسطى يوليو يتخلاو على ولادهم في إسبانيا من اجل مستقبل افضل، لأنه لا مستقبل في المغرب راه بنادم غير خاصل مادام الدولة ماطلقاتش الحريات وخسرات الفلوس في الترفيه، راه ليس بآمو وحده يحيى الإنسان ولكن بآمو وبالحرية والنشاط.