الطاكسيات الحمرين منوضين "الروينة" بسباب "اندرايف" وكينساو بلي "الكليان " هرب غير بسبب تعاملهم .

مصدر الصورة

كود كازا//

شهدات منطقة المعاريف بمدينة الدار البيضاء، يوم أمس الخميس 26 مارس، وقفة احتجاجية نظمها عدد من مهنيي سيارات الأجرة، خصوصًا أصحاب “الطاكسيات الحمر”، احتجاجًا على بانوات الإشهار اللي كتشهر لتطبيقات النقل عبر الهاتف، وحسب معطيات توصلات بها “كود” فإن المحتجين عبّرو على رفضهم لهد الإعلانات اللي كيشوفوها كتروّج لخدمات خارج الإطار القانوني، ووجهو رسائل مباشرة لمجلس المدينة ديال الدار البيضاء مطالبين بالتدخل العاجل وحيد هاد البانوات وتطبيق القانون على جميع المتدخلين فقطاع النقل، كما أكدو أن هاد التطبيقات ولات كتأثر بشكل كبير على المدخول اليومي ديالهم وكتخلق منافسة غير متكافئة، وأضافت نفس المعطيات أن هاد الوقفة كاتجي فظل توتر مستمر بين مهنيي الطاكسيات وتطبيقات النقل، مع إمكانية تصعيد الأشكال الاحتجاجية فحالة ما كان حتى تجاوب من طرف السلطات المحلية.

ولكن اجي نقوليكم ماشي هادو هوما تاكسيات لي منين كتشير ليهم كيوليو هوما “الكليان” كيتشرطو عليك واقوليك لا ماشي اتجاه ديالي ، وما شي هادا هو تاكسي حمر لي إلا لقا “3 بلايص” عائلة ، صحاب،خوت، مايهزكش وادير راسو مكسيمعش ؟ كازاوا عاقو شحال هادي ولاو كيفضلو “موطور أندرايف ” في البرد ومايبقاش كيتسنا تاكسي لي كيفرع ليه راسو بفلوس ” روسيطا” بحال إلا كيجيه من العائلة ، المغاربة كيتعاونو ولكن ناس فكازا خدامة ستريس مامسالياش ، باغين اوصلوا للمكان لي باغين بأريحية وأمان .

ومن جهة أخرى ، الأغلبية في كازا كيفضلو “بكليك” واحدة تجي عندهم طونوبيل حتا الدار و”بكليك” وحدة توصلهم فين بغاو ، ومكروهوش.

هاد القطاع ديال النقل السريع اتقنن وصحاب تاكسيات اتقبلو الحقيقة وكلشي اخدم بضمير ومسؤولية، التطبيقات بحال أندرايف ولات جزء من منظومة النقل الحديثة، وما يمكنش تجاهلها، واللي بغى يبقى في المنافسة خاصو يتأقلم ، ويتطور قبل ما يتهربو الكليان ويختارو البدائل اللي كتخدمهم ومنساوش راه مقبلين على تظاهرات كبيرة فبلادنا .