علاش رئيس الحكومة الصبليوني ضد الحرب؟ راه سانشيث سياسي انتهازي ورفضو للحرب على ايران فيها حسابات داخلية. احزاب التحالف الحكومي كلها من اليسار الراديكالي .

كود سعيد الشاوي ///

كثار من لمغاربة وحتى خارج المغرب اللي كيدعمو ايران او ضد اسرائيل كيقدمو رئيس الحكومة الصبليوني الاشتراكي بيدرو سانشيث “راجل” قدر يقول لرئيس امريكا ترامب “ما نخليكش تستعمل القواعد العسكرية الميريكانية فالحرب ضد ايران”. تشهر بعبارتو مع بداية ضرب ايران “لا للحرب”.

لكن راه رئيس الحكومة الصبليوني ما كيديرش هاد الشي كرجل سلام ابدا. كيديرو كرجل سياسي “انتهازي” براغماتي. باش تفهمو هاد المواقف خاص تعرفو التحالف اللي دايرو وخلاه فبلاصتو.

الحزب الاشتراكي الصبليوني اللي كيقود الحكومة متحالف مع احزاب اخرى غالبيتها من اليسار الراديكالي او الاحزاب الصغيرة الانفصالية خاصة فكاطالونيا واقليم الباسك.

الحكومة مشارك فيها كاع حزب يساري راديكالي “سومار”. خرج من حزب اخر يساري راديكالي هو “بوديموس”. هو فالحقيقة تحالف احزاب من اليسار الراديكالي وعلى رأسو يولاندا رياث، النائبة الثانية لرئيس الحكومة اللي كتشغل كذلك وزيرة للشغل.

طبعا “الپي سو اي” اي الحزب العمالي الاشتراكي ديال شانشيث مع “سومار” ديال دياث ما عندهم الاغلبية فاخر انتخابات تشريعية =2023= اللي جا فيها اللول الحزب الشعبي =حزب يميني= ولكن ما قدرش يوصل للاغلبية واخا مع الحزب اليميني المتطرف “بوكس”. الاغلبية اللي هي 176 مقعد، فكان عليه يقلب على هاد الاغلبية من احزاب اخرى يسارية وفيها جمهوريون واحزاب انفصالية.

هاد الاحزاب هي داعمة للحكومة وما مشاركاش فيها بحال “الحزب الجمهوري الكاتالاني =يسار راديكالي حتى هو و”جونس كاتالونيا” حزب انفصالي كاتالاني و”اي ايتشي بيلدو وهو حزب حتى هو انفصالي ولكن فالباسك وكاين حزب اخر باسكي ولكن ماشي انفصالي هو “الحزب الوطني الباسكي بالاضافة الى حزب صغير من گاليسيا.
مصدر الصورة
طبعا ايلى بتعبو تصريحات زعيمة “سومار” اللي واحدة من اكبر الداعمين للبوليساريو، راه واضحة. قالت باللي الحرب ضد “ايران غير قانونية” وباللي ” تنتهك ميثاق الأمم المتحدة” وباللي “دعم الشعب الإيراني “يجب أن يتجلى أولا وقبل كل شيء في المطالبة باحترام المعايير الدولية” وباللي “ترامب كيستاند ل”مصالح مشبوهة نفعية للغاية في إيران وفنزويلا أو في أجزاء أخرى من العالم”. طبعا خطاب اليسار الراديكالي.

سانشيث المعروف عليه ذكاؤو وذهاؤو السياسي وانتهازيتو لكبيرة ما يقدرش ياخذ شي موقف ضد مواقف احزاب كدعمو. اغلبيتو ضعيفة. فاخر ميزانية ليه راه حصل وما قدرش يدوز قوانين معينة لان ما قدرش يجمع ليها الاغلبية.

اليوم سانشيث ما عندو حتى شي خيار الا يكون رافض للحرب. رفضو ليها كيساهم فاستمرار حكومتو.

هدفو الاول ماشي الحرب فايران او عليها، يبقى فكرسيه كرئيس للحكومة