ماكرون عين سفير فرنسا فالمغرب على رأس وكالة التنمية.. ولوشيفالييه مرشح يعوضو فالرباط .

منذ

أنس العمري-كود///

قرر الرئيس الفرنسي، إيمانويل ماكرون، اليوم الثلاثاء، تعيين السفير ديال بلادو فالرباط، كريستوف ليكورتييه، على رأس الوكالة الفرنسية للتنمية، وهي مؤسسة مالية كتلعب دور كبير فتمويل مشاريع التنمية فعدد من الدول، ومن بينها المغرب.

وكيجي هاد التعيين فواحد السياق دبلوماسي اللي كيتسم بعودة الدفء للعلاقات بين الرباط وباريس بعد فترة من الفتور.

ومن المنتظر يخلف ليكورتييه، البالغ من العمر 63 سنة، المسؤول الحالي ريمي ريو ابتداءً من 3 ماي الجاي. غير أن هاد التعيين، اللي تعلن عليه مازال خاصو المرور من بعض المساطر القانونية، بحيث خاصو مصادقة البرلمان الفرنسي، إضافة إلى رأي إيجابي من الهيئة العليا للشفافية فالحياة العامة.

وليكورتييه ماشي وجه جديد فالمجال الاقتصادي والدبلوماسي، حيث سبق ليه ترأس مؤسسة بيزنس فرانس، وهي الهيئة المكلفة بتشجيع الاستثمارات والتجارة الخارجية لفرنسا.

ومع المنصب الجديد، من المنتظر يكون عندو نفوذ مهم داخل الوكالة الفرنسية للتنمية، خصوصا أن المغرب كيبقى من أكبر المستفيدين من تمويلات هاد المؤسسة على الصعيد العالمي، بعدما وصل حجم التمويلات المخصصة ليه إلى حوالي 3.2 مليار أورو.

وفالمقابل، كيتداول اسم أوريليان لوشيفالييه بقوة باش يخلف ليكورتييه كسفير لفرنسا فالرباط.

لوشيفالييه كيشغل حاليا منصب رئيس ديوان وزير الخارجية الفرنسي، وكيُنظر ليه كواحد من الشخصيات اللي لعبات دور مهم فتعزيز التقارب بين قصر الإليزيه والمغرب خلال الفترة الأخيرة.