رد على وزير الصحة.. رئيس مجلس المنافسة لـ"كود": مامتافقش مع الكبار ياكلو الصغار وها علاش خاص نفتحو استثمار فالصيدليات لصحاب الفلوس و4500 صيدلي مهدد بالإفلاس وها الحلول لي كنقترحو .

مصدر الصورة

كود الرباط//

رئيس مجلس المنافسة، أحمد رحو، فجواب على سؤال “كود” بخصوص تحفظ الحكومة من خلال وزير الصحة على توصيات مجلس المنافسة بضرورة فتح باب الاستثمار في قطاع الصيدلة أمام رأس المال، أكد بلي الحلول لي كيقترح مجلس المنافسة هي الصائبة وهي الوحيدة لي كاينا دبا.

وأكد رحو لـ”كود” بأن الهدف هو نفتحو نقاش وطني دبا، وإن تحفظت الحكومة وهذا حقها، مشددا بلي وزير الصحة بدوره أعلن استعداده لفتح النقاش.

وأوضح رحو بلي “مجلس المنافسة ماشي ضد الصيادلة وكيقترح حلول لصالح الصيادلة.. وبلي الاقتراحات الأخرى بغلق السوق والتكوينات ماشي فصالح الصيادلة”.

واقترح رحو فتح رأسمال الصيدليات و”سلسلة مجموعة الصيدليات” وبيع مواد أخرى من غير الأدوية داخل الصيدليات، سيساهم في إنقاذ الصيادلة من الإفلاس.

وأكد رئيس المجلس، في الندوة الصحفية الخاصة بتقديم رأي المجلس حول وضعية المنافسة في سوق الأدوية، بلي يدخلو صحاب الفلوس للاستثمار مكيعنيش أن الصيدلي مغايبقاش ولكن كيعاونو يبقا ويستمر ويحسن وضعيتو.

رحو كيرفض بشدة سياسات الإعانات الحكومية لمثل هاد القطاعات. ودافع يكون نموذج اقتصادي حر فالصيدليات.

رئيس مجلس المنافسة برر دفاعو على هاد الحلول، بكون أن المواطن هو لي كيدفع ثمن ديال هاد الواقع سواء عبر المشتريات أو الضرائب أو الاقتطاعات الموجهة للصندوق الوطني للضمان الاجتماعي.

وانتقد رحو عدم اعتماد توقيت نموذج للمواطنين، وبلي عدد من الصيدليات كيسدو بزاف وميمكونش سهولة للمواطن باش ياخد دوا.

وقال رحو بلي مامفتقش الكبار ياكلو الصغار، في اشارة الى بعض الصيادلة اللي عندهم نفوذ ومسيطرين ف جهتي كاز والرباط، فالمقابل باقي الصيادلة كيعانيو الهشاشة.