درس مغربي. ما عمر شي مدرب دار ليه تكريم وتقدم اللي غادي يجي فبلاصتو وكلشي داز فظروف واعرة فليلة رمضانية .

مصدر الصورة

مصطفى الشاذلي – كود سبور//

عاشت كرة القدم المغربية والافريقية والعربية والعالمية، البارح الخميس مع المغاربة حفل قمة فتامغرابيت، والمغاربة بينو مرة أخرى للعالم انهم دائما كرماء وكايعتارفو بالجميل لأي واحد كايدير معهم شي حاجة زوينة وكايحقق الانجازات، وهذا الشي اللي تجسد فحفل تكريم الناخب الوطني السابق وليد الركراكي وتعيين الخليفة ديالو محمد وهبي.

والبارح الخميس كان العالم كايتسنى حفل الإعلان عن رحيل وليد الركراكي وتعيين محمد وهبي حيث الكورة المغربية والمنتخب المغربي ولى عندهم إشعاع كبير، ولكن حتى حد ما كان كايتسنى يكون درس مغربي فليلة وداع الركراكي واستقبال وهبي، وكيفاش قدرت الجامعة الملكية المغربية لكرة القدم، تدير اللمسة المغربية على هذا الحفل وتجمع المدربين القديم والجديد بجوج فوقت واحد، وهنا فين كايبان الطابع المغربي الفريد، حيث المتتبعين ديال الكورة مولفين غير بإقالة مدرب او الانفصال عليه فبلاغ ولا ندوة بلا حفل تكريم وإلى كان الحفل فهو كايكون لتعين المدرب الجديد.

المكتب المديري للجامعة الملكية المغربية لكرة القدم، برئاسة فوزي لقجع كان ذكي فهاد المرحلة الانتقالية الحساسة من الكورة المغربية، واللي الهدف منها كيفما قال لقجع هو الاستمرار فتطوير اللعبة بالمغرب، فقرر يدير حفل تكريم ويعترف بالخدمات اللي دارها وليد الركراكي والإنجازات اللي حققها خلال تقريبا 4 سنين، واللي قدر يوصل مع المنتخب الوطني المغربي لدومي فينال مونديال 2022، وكانت كلمة الرئيس فوزي لقجع بالمناسبة شهادة تقدير فحق الركراكي والطاقم ديالو، وايضا شهادة على ان المغاربة عندهم تركيبة أصيلة ومربين على الوفاء والاعتراف بالجميل، وما كاينساوش اللي كايحقق شي إنجاز معهم سوا كان مغربي ولا اجنبي.

وليد الركراكي حضر للحفل وهو ناشط، ودخل للقاعة مع فوزي لقجع وكانو داخلين مع الباب وهما ناشطين وكايهضرون بكل مودة واحترام بحال الصحاب، وهذا الشي راه قليلة فين ممكن يوكون ما بين رئيس جامعة كرة قدم ومدرب يالاه تفارقو، ولكن المغرب والمغاربة بينو ان هذا الشي راه ممكن يكون، وحتى إلى كانت شي خلافات راه يمكن تجاوزها والعلاقة تبقى زوينة وقوية، حيث شكون الضامن للمستقبل راه ممكن الركراكي اللي مشى بحالو اليوم يرجع غدا للمنتخب ولا يشد شي بوسط فالجامعة.

وفالكلمة ديالو بادر وليد الركراكي لشكر الملك محمد السادس على الدعم اللي عطاه للكورة المغربية واللي كان أساس الإنجازات والنجاحات اللي تحققت، وشكر فوزي لقجع والجامعة الملكية المغربية لكرة القدم على المساندة ديالهم له خلال مرحلة العمل ديالو، وشكر حتى اللاعبين على مجهوداتهم وكل ما عطاوه للمنتخب، ووجه الشكر للجمهور المغربي على تشجيعهم له، واللي زوينة هي تمنى التوفيق للخلف ديالو محمد وهبي وانه حتى هو يحقق الإنجازات مع الكورة المغربية، وتسلم جائزة تذكارية د المنتخب المغربي من عند فوزي لقجع رئيس الجامعة الملكية المغربية لكرة القدم.

ومن بعدها اعلن رئيس الجامعة الملكية المغربية لكرة القدم فوزي لقجع عن تعيين محمد وهبي مدربا جديدا للمنتخب المغربي، واكد انه مدرب كايخدم بزاف وما كايهضرش بزاف، وان دابا ما بقاش السؤال على اللجوء للمدرب الأجنبي بفضل تواجد عدد من المدربين المغاربة اللي ناجحين، وطلب لقجع من وليد الركراكي يطلع للمنصة، باش يكون معهم خلال تسليم التوني د المنتخب المغربي لوهبي، ولكن الركراكي ما بغاش باش ما يغطيش على المدرب الجديد، ويخليه مرتاح وهو كايستلم المهام الجديدة ديالو كناخب وطني جديد، وهادي راه ماشي اي واحد يفكر فيها ويديرها.

محمد وهبي وخلال الكلمة ديالو، شكر الملك محمد السادس على المساندة ديالو للكورة المغربية، وشكر الجامعة الملكية المغربية لكرة القدم برئاسة فوزي لقجع حيث ثاقو فيه وعطاو مسؤولية الإشراف على المنتخب الوطني المغربي، وواعد الجماهير المغربية يكمل فنفس الخدمة ويحقق الإنجازات مع المنتخب، وشكر السلف ديالو وليد الركراكي على العمل اللي دار وتمنى له التوفيق.

هذا الحفل داز كولو وسط اجواء زوينة بمركب محمد السادس لكرة القدم، وكلشي كان ناشط وهو كايشوف حفل بين مكونات الكورة المغربية فيه بزاف من الاحترام والتقدير بين الناس اللي حضروه، وطغى هذا الحدث على ساحة الكورة العالمية، والعالم تبعوه وشافو كيفاش المغاربة كايدبرو الأمور ديالهم، وكيفاش فحفل بسيط خفيف قدرو يكرمو ناخب وطني حقق مع المنتخب الوطني المغربي دومي فينال مونديال 2022، ووصل معه لفينال كاس أفريقيا بعد كثر من 20 عام من الغياب على النهاية، وحقق معه احسن إنجاز فالترتيب العالمي بالوصول للمركز الثامن عالميا، ويعطيوه حقو، وفنفس الوقت يموتيفيو الناخب الوطني الجديد اللي خدا بلاصتو باش حتى هو يمشي فنفس الطريق ويحقق إنجازات مع ليكيب ناسيونال.