كولشي عاقل على الروينة لكبيرة اللي وقعات فشارع مولاي رشيد بطريق صفرو ففاس هادي 11 يوم. الحكاية ومافيها أن أحد المستخدمين في شركة لتنظيم الحفلات كان غادي فشي موطور ووقع ليه خلاف بسيط مع شيفور ديال الطاكسي.

هاد الطاكسي اتهم هاد المستخدم أنه قاصو بالموطور من اللور. لكن المفاجأة أن داك الطاكسي نزلو منها جوج بوليس، وأحدهم جبد المينوط وشد داك السيد بدون وجه حق، بينما البوليسي الثاني عرضو للسب والقذف، وهادشي أمام عشرات الناس اللي كانوا متابعين هاد الحدث اللي كولشي استنكر ليه.

وحسب مصادر كشفت عنه مصادر “كود”، فإن جوج بوليس تم الاستماع إليهما من طرف فرقة الشرطة القضائية بالمنطقة الأمنية الثانية اللي تكلفات بالبحث فهاد القضية، في انتظار الاستماع لبوليسي آخر اللي مزال كونجي.

النيابة العامة دبا مزال كتساين نتائج البحث القضائي فهاد الملف، بالموازاة مع البحث الإداري المفتوح، إذ سبق للضحية أن استنجد بعبد اللطيف حموشي المدير العام للأمن الوطني ومراقبة التراب الوطني باش ياخد حقو ويكون بحث دقيق ونزيه، وباش هادشي ميتعاودش مع مواطنين آخرين.

فرقة الشرطة القضائية كانت شافت فيديو يوثق لهادشي، وتم الاستماع إلى عدد من الشهود، في انتظار إحالة المسطرة على النيابة العامة المختصة لاتخاذ المتعين قانونا.

يذكر أن البوليسي اللي جبد المينوط ديالو وكان خارج أوقات الخدمة ماوقفش التصرف ديالو حد هنا. بل حسب شهود عيان لـ”كود” فقد عرض الضحية للضرب، قبل متجي سيارة النجدة وتهز الضحية بالزربة وطلعوه فالطوموبيل ديال المصلحة في اتجاه ديمومة المنطقة الأمنية الثانية فاس الجديد دار دبيبغ التي كانت تسايرها الدائرة الأمنية الثانية.

وقالت المصادر باللي الضحية جبد البورطابل ديالو باش يصوّر داك البوليسي اللي ضربو ودار ليه المينوط، لكن واحد الضابط ناض حذف داك الفيديو اللي كيوثق هاد الفعل المخالف للضوابط القانونية والمهنية المفروضة فرجال الأمن، وتم معاينة الفيديو اللي باين فيه هاد البوليسي داخل المداولة شاد فالبورطابل ديال هاد السيد، كما تم الاستماع أيضا لهاد البوليسي.