غي حنا من دون العالم كامل لي مقتانعين بلّي نقدرو نديرو الكوميديا بتعواج الوجه و تخراج العينين و الغوات ! التيبارية و محجوبة كمثال، ماعرفتش شكون كاضّحكو ديك السلسلة و لكن براڤو ليكم أسستوا لمدرسة كوميدية جديدة - الكوميديا التعواجية .

مصدر الصورة

سهام البارودي – كود//

مؤخرا مشيت تفرجت فواحد الستاند آب كوميدي ديال الكوميديانة لبنانية فباريس، السيدة مازالة صغيرة فالسن كتاشفتها فأنستاغرام سميتها شادن و العرض كان فكوفي شوب لي الحاضرين فيه ربعين- خمسين واحد على أقصى تقدير و الثمن كان رخيص بزّاف ماكاملاش ثلاتين اورو.
و لكن كانت تجربة واعرة، ساعة و نص ديال الضحك، كرشك ضرّك بالضحك، و طبعا كوميديا كاتناقش الدّين و الجنس و الطائفية فلبنان و حزب الله و الحروب لي فالشرق الاوسط و المثلية الجنسية و السياسة و نبيه برّي …. و بدون طابوهات و الحاجة لي عجباتني بزّاف هوا التقبّل ديال الجمهور لي كان الأغلبية فيه من جنسية لبنانية لهاد النوع ديال الكوميديا بكل رحابة صدر، أول مرة غانشوف “عرب” متصالحين مع الطابوهات ديالهم و كايضحكو عليهم بداك الشكل…
تفكرت هادشي فاش تفرجت فشي حلقات ديال التيبارية و محجوبة، (ايه الكوميديا فالتلفزة الرسمية ماشي هي الكوميديا ديال الستاند اب كوميدي شو و المغرب ماشي هوا لبنان و المغاربة ماشي لبنانيين) و لكن ماشي حيت المغاربة ماشي لبنانيين غاتعطيوهم ياكلو التبن ديال الكوميديا، البادگام ديال الكوميديا الحامضة، كوميديا ديال تيمو… راه غا حنا لي باقيين فالعالم كامل كايصحابنا قادرين نديرو الكوميديا بتعواج الوجه و تخراج العينين و تشقليب الهضرة، دابا داخلت عليكم بالله واش كوميديا هاديك كادير محجوبة و التيبارية ؟ واش خاصنا نضحكو ؟ راه نجلس غا نص ساعة كانسكرولي فأنستاغرام، نتفرج غا فالريلزات لي كايبارطاجي معايا صاحبي جمال اگداش و غانخرى بالضحك اكثر من وانا كانتفرج فداك الحاماق ديال التيبارية و محجوبة ! مؤسسات الكوميديا التعواجية…
فكروني فديك الكوميديا عصر ما قبل ظهور السترينگ، فاش كان القايد كايعيط للشي عبد عندو و كايبقى يعوج وجهو و يدير فديك الحركات البهلوانية و ينقز و القايد كايتنشر بالضحك على ظهرو …
ايه حنا عارفين التلفزة الرسمية ديالنا كاتقلب على كوميديا بسيطة و سلسة و مافيهاش الصداع و المشاكل مع اي جهة من الجهات، كوميديا تقدر دوز فطبلة د الفطور و بنادم كايشرب الحريرة بلا مايضطر الواحد ينقز من الشرجم و لا يهرب مع الباب لاتقالت شي كلمة فشكل فالتلفزة، و لكن ماشي لدرجة تسربي لينا تعواج الوجه و تشقليب الهضرة على اساس أنها كوميديا و مخسور عليها الفلوس من أموال دافعي الضرائب.
شحال هادي كنّا كانتشكاو من الحموضة ديال الانتاجات الرمضانية أما دابا راه فتنا مرحلة الحموضة و دخلنا فسرطان المريئ الله يشافينا و يشافيكم قولو آمين !