فوضى الباعة المتجولين خنقات شوارع فاس مزيان مع دخول رمضان وعدد من السكان لـ"كود": خاص التدخل باش تسالي هاد السيبة (تصاور) .

كود – فاس//

كتعرف أهم شوارع مدينة فاس، مع بداية شهر رمضان، انتشار خطير وغير مسبوق ديال البياعة المتجولين وأصحاب الكراول المجرورة، فمشهد ولى كيقلق الساكنة وكيطرح بزاف ديال علامات الاستفهام حول الأسباب اللي ورا هاد التوسع المفاجئ، خصوصاً فالمجال الترابي ديال الملحقة الإدارية الأطلس.

وسجلات هاد الظاهرة، كما عاينت “كود”، ارتفاع كبير فعدد من المحاور الطرقية المهمة، وعلى رأسها حي الأطلس والأزقة اللي دايرين بيه، وزيد عليهم شارع الشفشاوني ومدارة الفندق الكبير، وغيرها من النقاط الحيوية اللي ولات محتلة بشكل شبه كامل من طرف الفراشة وصحاب لكرارس ونقط البيع العشوائي.

مصدر الصورة

وتسبب هاد الانتشار المكثف لحدود كتابة هذه الأسطر فاختناق مروري كبير، كيبدا من الصباح بكري وكيبقى حتى لوقت الفطور، ومن بعد كيرجع نفس المشكل فالليل، الشي اللي كيزيد يعقد حركة السير وكيخلق معاناة كبيرة لمستعملي الطريق، سواء الطوموبيلات ولا الراجلين.

وكتأكد الساكنة أن الوضع ولى ما يتسكتش عليه، فظل الفوضى اللي ولات كتعرفها هاد الشوارع، واللي ماشي غير كتعطل السير، ولكن حتى كتعرض سلامة المواطنين للخطر، خصوصاً مع تكدس الكراول وسط الطريق وغياب التنظيم.

مصدر الصورة

وفهاد السياق، تعالت أصوات المواطنين اللي ولات كتسول على الجهات اللي ممكن تكون واقفة ورا استمرار هاد الوضع، مع مطالب بضرورة القيام بمعاينات ميدانية وتشكيل لجان مختصة باش يوقفو على هاد الظاهرة الخطيرة، واتخاذ الإجراءات اللازمة باش يرجع النظام للشارع العام.

“كود” هضرات مع عدد من السكان اللي عايشين الجحيم مع هاد الظاهرة، وأجمعوا باللي التدخل ولى ضروري وبشكل مستعجل، خصوصاً فرمضان اللي كتعرف فيه المدينة حركة كبيرة، باش يتم احترام القانون، وحماية المواطنين، وضمان انسيابية حركة السير فمختلف شوارع مدينة فاس.