البارح الخميس قدمو البوليس ديال الدائرة الأمنية الثانية فخنيفرة أمام النيابة العامة بابتدائية لمدينة، واحد الشخص عندو 54 عام، كيتشبّه فيه بتورطو فممارسة الشعوذة والنصب، وحيازة واستعمال أعشاب ومواد اللي ممكن تشكل خطر على صحة الإنسان، وزيد عليها استعمال وصفات طبية مشبوهة.

وبحسب المصادر ديال “كود”، فإن هاد التدخل جا بأمر من النيابة العامة، بحيث تنقلات عناصر الشرطة لدار المعني بالأمر ودارت تفتيش قانوني، اللي خلا يحجزو مجموعة من الأدوات والمواد المرتبطة بهاد النشاط.

ومن بين هاد الأدوات والمواد، وفق مصادرنا، كاين خلطات ديال الأعشاب، قنينات فيها مواد مطحونة، طلاسم وتمائم، قطع ديال الثوب، وتصاور ديال رجال وعيالات، وزيد عليها وصفات طبية وأدوية من بينها “ALPRAZ” و”NODEP 50mg”.

وخلال البحث، اعترف المشعوذ باللي كيمارس هاد الأنشطة المرتبطة بالشعوذة من أكثر من عشرين عام، وكان كيستقبل الزبناء فدارو أو كيتواصل معاهم عبر تطبيق “واتساب”، وكيطلب منهم تصاور ومعلومات شخصية باش يدير طقوس كيدّعي أنها كتستهدف العلاج أو فك السحر أو استرجاع العلاقات العاطفية أو حل مشاكل شخصية.

كما صرّح أنه كان كيستعمل خلطات ديال الأعشاب بطرق مختلفة، من بينها الشرب أو طقوس خاصة، وكيقول للزبناء باللي هاد الطقوس كتعاون على التخلص من “الأرواح الشريرة” وكتعالج أعراض كيربطها بالسحر، مقابل مبالغ مالية كان كيتوصل بها عبر تحويلات مالية من المغرب وحتى من الخارج.

وأظهرت عملية تفتيش الهاتف ديالو وجود محادثات صوتية وكتابية مع عدد من الأشخاص، فيها طلبات مرتبطة بالشعوذة، من بينها استرجاع أزواج، التأثير على علاقات عاطفية، أو حل نزاعات شخصية، بالإضافة إلى تصاور ومعلومات كان كيستعملها فهاد الطقوس.

كما لقاو المحققين عندو بطاقة تعريف مهنية منسوبة لـ“الشرفاء الأدارسة” باسم مختلف على الاسم الحقيقي ديالوالو، واعترف أنه كان كيستعملها باش يقنع الزبناء باللي عندو مكانة خاصة ويعزز الثقة ديالهم فيه، رغم علمو أنها غير قانونية.

وفإطار البحث، تعرضات الأعشاب المحجوزة على مختصين، وأكد طبيب تابع للمكتب الصحي البلدي باللي بعض الأعشاب، ومن بينها عشبة “الفيجل”، ممكن تكون خطيرة إلى تستعملات بطريقة عشوائية أو بجرعات غير مضبوطة، وقد تسبب مضاعفات صحية مختلفة.

كما بيّنات التحريات أن المعني بالأمر سبق حصل على وصفة طبية لدواء “ALPRAZ” بتاريخ 12 غشت 2024 لمدة محددة، ولكنه بقى كيستعملو من بعد انتهاء المدة، وزيد عليها العثور على وصفة أخرى لدواء “NODEP 50mg”، اللي كيستعمل فبعض الحالات النفسية.

المثير فهاد الملف، حسب مصادر “كود”، هو أن الجيران رفضوا يمشي عندو البوليس للاستماع إليهم كشهود بدعوى أنهم خافين من هاد المشعوذ يصيفط ليهم الشياطين والأرواح الشريرة.

دبا هاد المشعوذ، حسب مصادر “كود”، البارح داز عند النيابة العامة اللي هبطاتو للحبس، وتابعاتوا من أجل “النصب، الإيذاء العمدي، حيازة أقراص طبية مخدرة واستهلاكها، إدعاء ميزة شرفية”، وقررت المحكمة باش تأخر الملف ديالو لجلسة 26 فبراير الجاري باش يشوف شي محامي اللي يدافع عليه