عشية اليوم الخميس ففاس وقعات روينة كبيرة فشارع مولاي رشيد بطريق صفرو. الحكاية كل ومافيها أحد مستخدم فشركة لتنظيم الحفلات كان غادي فشي موطور ووقع ليه خلاف بسيط مع شيفور ديال الطاكسي.

شيفور الطاكسي اتهم المستخدم أنه قاصو بالموطور من اللور. لكن المفاجأة أن داك الطاكسي نزلو منو جوج أشخاص، وأحدهم جبد مينوط وشد داك السيد بدون وجه حق، بينما البوليسي الثاني عرضو للسب والقذف، وهادشي أمام عشرات الناس اللي كانوا متابعين هاد الحدث اللي كولشي استنكر ليه.

البوليسي اللي جبد المينوط ديالو وكان خارج أوقات الخدمة ماوقفش التصرف ديالو حد هنا. بل حسب شهود عيان لـ”كود” فقد عرض الضحية للضرب واصلت بفرقة النجدة اللي جاو بالزربة وطلعوه فالطوموبيل ديال المصلحة في اتجاه ديمومة المنطقة الأمنية الثانية فاس الجديد دار دبيبغ التي كانت تسايرها الدائرة الأمنية الثانية.

وقالت المصادر باللي الضحية جبد البورطابل ديالو باش يصوّر داك البوليسي اللي ضربو ودار ليه المينوط، لكن عنصر من الدراجين اللي جا لهاد التدخل حيط ليه البورطابل وداه معاه لمصلحة الديمومة وعطاه لشي ضابط تما. هاد الضابط ناض حذف داك الفيديو اللي كيوثق هاد الفعل المخالف للضوابط القانونية والمهنية المفروضة فرجال الأمن.

دبا الضحية حط شكاية فالمنطقة الأمنية الثانية، وكيلتمس من المدير العام للأمن الوطني مراقبة التراب الوطني يكلف الجهات المختصة باش تفتح بحث دقيق على هاد الواقعة اللي موثقة في كاميرات المراقبة المتواجدة بالشارع العام.

رئيس الدائرة الأمنية الأولى فاس الجديد دبا هو لي عندو هاد الشكاية ومشا مع الضحية لمكان الحادث باش يشوفو الكاميرات بعدما تم الاستماع إلى المشتكي في محضر قانوني وإشعار النيابة العامة المختصة بهادشي.