انتخابات 2026. التحالف الحكومي فاڤوري والمعارضة ما عندها جهد ليها .

مصدر الصورة

كود الرباط//

المعطيات القادمة من كواليس اللقاءات والاجتماعات ديال قادة الأحزاب السياسية الممثلة في البرلمان، سواء المعارضة أوالأغلبية، تفيد بلي التوقعات ديال شكون يتصدر انتخابات 2026 غاتكون محصورة بين أحزاب التحالف الحكومي: الأحرار والبام والاستقلال.

هاد التوقعات، مكانتش غير حسابات ديال المقاعد لي كيديرها كل حزب، بل كذلك على الاستعدادات المكثفة لي كيديرو هاد الأحزاب تنظيميا، والحروب لي كيديرو بيناتهم فالدوائر المهمة، ناهيك عن استفادتهم من مواقعهم الحكومية فاستقطاب الأصوات.

فالمدن الكبرى كلها تقريبا، يقول مصدر حزبي، الحظوظ كلها للأحزاب الثلاثة المتحالفة حاليا ف الحكومة، مضيفا بلي تنظيميا الأحرار باقي واجد وقادر يحافظ على الرتبة الأولى، فيما البام بدات تحركات قوية مؤخرا وغادير 100 لقاء فكل مدينة وإقليم فظرف شهر. غير فهاد الويكاند دار 10 لقاءات.

مصدر قيادي فالبام قال لـ”كود”: “الاستعدادات مكثفة.. عندنا حظوظ فمن الطبيعي نكونو باغين المرتبة الأولى حيث حنا لي نافسنا الأحرار ف انتخابات 2021 وكنا قراب نديو الانتخابات”، مضيفا: “حتى داخليا نظمنا الحزب ونظفناه.. للي عندو متابعات ميمكنش يترشح أصلا”.

فالمدن الكبرى، يقول مصدر استقلالي لـ”كود”، بلي الأحزاب الثلاثة التي تبوأت انتخابات في 2021 مازالت حظوظها كبيرة باش تربحها”.

لقاءات مكثفة موجدين ليها الأحزاب دالاغلبية فرمضان، ليالي ولقاءات مكثفة، فالمقابل أحزاب المعارضة باقا كتعكل، استمرارية نفس القيادات السابقة (لشكر، بنعبد الله، بنكيران..) كيزيد يأكد بلي غير مستعدة للتغيير وتعطي أجوبة للمرحلة المقبلة.

تحديات كبيرة كتسنا بلادنا، أولها تنزيل ومواكبة الحكم الذاتي في صيغته الجديد، المونديال، استكمال المشاريع الاجتماعية (الدعم المباشر، دعم السكن، التغطية الصحية لجميع المغاربة). كتحتاج أحزاب بكفاءات جديدة وطاقات شابة، باركا من السكة القديمة خصها تفهم راسها وتحط سوارتها.