حزب الاصالة والمعاصرة واكل الدق زمن بنت الباشا فاطمة الزهرا المنصوري وتابعها المدلل المهدي بنسعيد. زمن هاد القيادة الحزب ماشي عاش هزات بل زلازل ومازال العاطي يعطي. اخر ضربات للحزب كانت هروب محمد بودرا برلماني وكان رئيس المجلس البلدي للحسيمة واحد وجوه البام زمن حكم الياس العماري. الرفيق بودرا بعد ما عاش امجادو السياسية مع التراكتور رجع للحزب اللي كان فيه.

بودرا ما شرحش علاش رجع. دار تدوينة قبل 3 ايام فيها “أعلن عودتي إلى حزب التقدم والاشتراكية، الذي سبق لي أن التحقت به بالناظور سنة 1991، حين كنت طبيباً بالمستشفى الحسني بالناظور. وإني أتمنى صادقاً التوفيق والنجاح لأخواتي وإخواني في حزب الأصالة والمعاصرة”. عودة فيها انتهازية كيف كان التحاقو انتهازي النهار اللول بحزب عارفو كيفاش جا. دابا باش تقلبات الوضعية وما بقاش جناح الريف مهيمن على البام قرر يهرب.

قبلو بايام كان الامين العام الجهوي للبام فكازا امبراطور الفروماج لملايري اللي بدا حياتو بالتهريب من الشمال عبد الرحيم بن الضو قد قرر ينساحب من الحزب على خلفية قرار قاضي التحقيق فاستئنافية كازا تحيد ليه الباسبور وتسد عليه الحدود فقضايا خايبة عندها علاقة بنشاطو فتصدير واستيراد المواد الغذائية. مورط معاه مديرو المالي وجوج من اطر “اونسا” كانو فكازا وطنجة.

طبعا كازا هي الجهة اللي كلات لعصا فالبام. كانت قضية ايسكوبار الصحرا والمتابع فيها الرجل القوي فالبام فالسنوات الاخيرة سعيد الناصري. طبعا معاه رجل البام الاقوى فجهة الشرق عبد النبوي عبيوي رئيس جهة الشرق اللي حتى هو مشدود فهاد القضية مع افراد من عائلتو فقضية ايسكوبار الصحرا.

جهة كازا كانت عرفات سقوط الرجل الثالث فالقيادة الجماعية للبام صلاح ابو الغالي بسباب اختيار المنصوري دعم بن الضو فقضية عندها علاقة بارض ماشي بافكار سياسية.
دابا فعدد من جهات الحزب كاين رغبة يهربو او ما يمكنش ليهم يترشحو بسباب قانون الانتخابات. المحكمة الدستورية كانت اكدات فقرارها حول قانون الانتخابات، أن ما نصت عليه المادة السادسة منه من منعٍ مؤقت للترشح للعضوية في مجلس النواب، بالنسبة للأشخاص المتابعين في حالة تلبس بارتكاب جناية أو إحدى الجنح المشار إليها في البند 5 خلال الحملة الانتخابية، وهي جرائم تتعلق بالمروءة والأخلاق والاستقامة وسلامة الذمة أو بالمس بصدقية وسلامة العملية الانتخابية… جاء ترتيبا من جهة أولى، لما أقره الدستور من عقوبات، بمقتضى القانون، على كل شخص خالف القواعد والمقتضيات المتعلقة بنزاهة وصدق وشفافية الاقتراع، وعملا من جهة ثانية، بمبدأ ربط المسؤولية بالمحاسبة المقرر في الفقرة الثانية من الفصل الأول من الدستور، بالنسبة لمن تم عزلهم من مسؤولية انتدابية.

هادا كيعني ان نجوم كبار فالبام ما غادينش يترشحو. طبعا هاد القانون كيسري على كلشي ومرشحين كبار فكاع الاحزاب الكبرى ما غادينش يترشحو ولكن البام من اللي غادي يخسر بزاف.

دابا الحزب تقريبا غادي يخسر كازا والشرق وفالرباط ما يروج على مهدي بنسعيد غادي يكون تأثير على صورة هاد الحزب فالعاصمة. علاقاتو وترفيحتو وتركيزو على اعطاء صفقات كتهم الوزارات اللي كيشرف عليها لشركات محددة بحال ديال مريم ابيدزير “اڤان سين” من تدبير ريسطو “شالة” حتى جميع انشطة هاداك الشي ديال “الگايمين” وزيد عليها تخربيقة الطونوبيلة اللي دارها مع بلخياط وتقدمات لسيدنا ودازشحال من عام ومازال ما شفنا والو…..