"لارام" دارت أكثر من 80 رحلة فالسيمانة كتربط المغرب بأوروبا وها التفاصيل .

مصدر الصورة

عمر المزين – كود///

قررت الخطوط الملكية المغربية تزيد تقوّي العرض ديالها بثلاث خطوط مباشرة ومنتظمة غادي يربطو طنجة بمالقة وبرشلونة ومدريد، إضافة لثلاث خطوط أخرى غادي تربط الناظور ببرشلونة وفرانكفورت ودوسلدورف، وهادشي جا بعدما تحلّات خطوط مباشرة من تطوان لبرشلونة ومالقة ومدريد، ومن كازا لبلباو وأليكانطي.

وفهاد السياق، أكّد حميد عدو، الرئيس المدير العام ديال الخطوط الملكية المغربية، بلي إطلاق هاد المسارات الجوية الجديدة فشمال المملكة كييجي مكمّل لافتتاح القاعدة الجوية فتطوان، وكيبيّن بالملموس مدى التزام الشركة بالمساهمة فالإشعاع السياحي ديال المغرب.

وأضاف بلي هاد الخطوط الاستراتيجية نحو أوروبا كتجاوب مع الطلب المتزايد على الربط الجوي، وكتساهم فتقوية المبادلات الاقتصادية والسياحية والإنسانية ما بين المغرب وأوروبا، وداخلة فالمخطط التنموي اللي كيهضر على الارتقاء بلارام كناقل شمولي وعالمي عندو شبكة واسعة ومعززة برحلات مباشرة وبلا توقّف.

وبفضل هاد الخطوط الجديدة، غادي تولّي الشركة الوطنية كاتربط تسعود مدن إسبانية، وهي مدريد وبرشلونة ومالقة وإشبيلية ولاس بالماس وتينيريفي وبلباو وأليكانطي، بخمس مدن مغربية اللي هما الدار البيضاء والعيون وطنجة وتطوان والناظور، بما يفوق 80 رحلة فالأسبوع. ومن جهة أخرى، غادي يتم ربط ثلاث مدن ألمانية، وهي فرانكفورت ودوسلدورف وميونيخ، بثلاث مدن مغربية هي الدار البيضاء والناظور ووجدة، بأكثر من 35 رحلة فالأسبوع.

وكيعزّز هاد التوسّع مكانة الخطوط الملكية المغربية كجسر جوي استراتيجي ما بين المغرب وأوروبا، وكيعاون بزاف فتقوية الربط المقترح من طرف الدار البيضاء كمحور مطاري مهم، الشي اللي كيخلّي المسافرين الجايين من أوروبا يستافدو من ولوج ساهل للشبكة الإفريقية والدولية الواسعة ديال الشركة.

وكشفت لارام بلي تذاكر هاد الرحلات غادي يتفتحو للبيع ابتداءً من 10 فبراير 2026 فالموقع الإلكتروني ديال الشركة، وعبر مراكز النداء والوكالات التجارية وشبكة وكالات الأسفار.

وبالنسبة لبرنامج الرحلات، فخط طنجة–مالقة غادي يكون نهار الاثنين والجمعة ابتداءً من 6 يوليوز 2026، وخط طنجة–مدريد الاثنين والسبت ابتداءً من 7 شتنبر 2026، وطنجة–برشلونة الاثنين والجمعة ابتداءً من 3 يوليوز 2026.

أما من مطار الناظور، فخط الناظور–برشلونة غادي ينطلق الخميس والسبت ابتداءً من 10 شتنبر 2026، وخط الناظور–فرانكفورت الثلاثاء والخميس والسبت ابتداءً من 2 يوليوز 2026، بينما خط الناظور–دوسلدورف غادي يكون الأربعاء والخميس والسبت ابتداءً من 11 يوليوز 2026.