حركة قريبة عند رجال السلطة قبل الانتخابات… تقارير كحلة فيها البني العشوائي واحتلال الملك العمومي غا تعصف بعدد منهم .

منذ

عمر المزين – كود////

يتوقع أن تطلق وزارة الداخلية حركة واسعة فصفوف رجال السلطة فالأيام الجاية، وهاد الشي جاي فإطار الاستعدادات للاستحقاقات الانتخابية المقبلة، وكذلك باش يتم تقوية الفعالية فالتسيير الترابي وربط المسؤولية بالمحاسبة.

معطيات حصلت عليها “كود” كتقول باللي هاد الحركة ما غاديش تكون غير عادية، ولكن غادي تشمل تنقيلات وحتى إعفاءات مبنية على تقارير ميدانية ترفعات من طرف مصالح مركزية وجهوية على أداء عدد من المسؤولين.

الوزارة حاطة فالأولوية ديالها معالجة الاختلالات المرتبطة بانتشار البناء العشوائي، اللي تسبب فبعض المناطق فأحداث مؤلمة وخطيرة ومات بسببها عدد من المواطنين، وبيّن تقصير واضح فالمراقبة والزجر.

وحسب المصادر، فإن تقارير دقيقة دارتها لجن تفتيش وأقسام الشؤون الداخلية وقفات على مسؤوليات مباشرة ديال بعض رجال السلطة فانتشار هاد الظاهرة، سواء بسبب التساهل فتنفيذ القانون ولا التغاضي على خروقات كبيرة.

ومن جهة أخرى، كاينة مؤاخذات متعلقة بضعف التدخل لمحاربة احتلال الملك العمومي فشوارع رئيسية فعدد من المدن، فين ولات الفوضى مشهد يومي كيضر بحركة السير وكيشوّه المنظر العام ديال المدن.

الداخلية طبعا كتشوف باللي التصدي لهاد الظاهرة خاصو يكون معيار أساسي فتقييم أداء المسؤولين الترابيين وقدرتهم على فرض هيبة القانون. وكتفيد نفس المعطيات أن الحركة المرتقبة غادي تعتمد على معايير الكفاءة والنزاهة والقرب من المواطنين، مع إعطاء الفرصة لكفاءات تشد المسؤولية فمناطق حساسة فالمرحلة الجاية.