شاكر تلاحت على اختصاصات الوزير برادة.. صيفطات مراسلة لـ3 مدراء أكاديميات وكتطلب منهم استقبال التلاميذ ضحايا فيضانات القصر الكبير .

مصدر الصورة

كود – طنجة ///

خلّفات مراسلة منسوبة لوفاء شاكر، مديرة الأكاديمية الجهوية للتربية والتكوين بجهة طنجة تطوان الحسيمة، واحد الجدل كبير وسط رجال ونساء التعليم والمهتمين بالشأن التربوي، بعدما طلبات من مدراء أكاديميات الدار البيضاء سطات والرباط سلا القنيطرة وفاس مكناس يعطيو تعليماتهم لجميع المؤسسات التعليمية العمومية والخصوصية باش يستقبلو التلاميذ الجايين من مدينة القصر الكبير والمناطق المتضررة من الفيضانات، ويخلّيوهم يقراو بصفة مؤقتة حتى ترجع الأوضاع لطبيعتها.

هاد الخطوة، رغم أنها كتبان من الناحية الإنسانية معقولة وكتسعى باش ما يضيعش الموسم الدراسي ديال الأطفال، إلا أنها طرحت تساؤلات قانونية كبيرة: شكون عندو الحق يصدر بحال هاد القرارات؟ واش المديرية الجهوية ولا الوزارة الوصية؟.

بزاف ديال الأطر التربوية اعتبرو أن هاد الإجراء خاصو يخرج مباشرة من عند وزير التربية الوطنية والتعليم الأولي والرياضة سعد برادة، ماشي من عند مديرة أكاديمية، حيث المسألة كتهم تدبير وطني واستثنائي ماشي محلي.

مصادر من داخل القطاع أكدت باللي استقبال تلاميذ من جهات أخرى وتسجيلهم بشكل مؤقت خاصّو سند قانوني واضح صادر عن الوزارة، باش يكون مرجع للمؤسسات التعليمية وما يطيحوش فمشاكل إدارية من بعد، سواء فالتسجيل ولا فالنقط ولا فالمسار الدراسي ديال هاد الأطفال. وغياب مذكرة وزارية رسمية، كيخلّي العملية كلها معلّقة فالهوا وبدون إطار قانوني مضبوط.

عدد من الفاعلين شافو أن اللي دارتو مديرة أكاديمية طنجة هو “ترامي صريح على اختصاصات الوزير برادة”، وتجاوز لتراتبية القرار داخل المنظومة التربوية، حيث كان المفروض عليها ترفع مقترح مستعجل للوزارة وهي اللي تصدر مذكرة وطنية موحّدة كتطبّق على جميع الأكاديميات، باش يكون التعامل موحّد وبسند قانوني صحيح.

لحدّ الآن، وزارة التربية الوطنية ما خرجات حتى توضيح رسمي فهاد الموضوع، والجدل باقي مفتوح حول حدود صلاحيات المسؤولين الجهويين وعلاقة هاد الصلاحيات باختصاصات الوزير.

وبين هاد الأخذ والرد، كيبقى السؤال الكبير: واش كان استعجال إنساني ولا تجاوز إداري؟ والأهم، شكون غادي يتحمّل المسؤولية القانونية إلى وقعات شي مشاكل فتنزيل هاد القرار؟