نشرة إنذارية جديدة: الشتا مجهدة جاية مع رياح عاصفية حتى لـ85 كلم فالساعة فعدد من أقاليم بلادنا وها التفاصيل .

مصدر الصورة

عمر المزين – كود///

علنات المديرية العامة للأرصاد الجوية فـنشرة إنذارية محيّنة رقم 36/2026، صادرة نهار الخميس 5 فبراير 2026 مع العاشرة و54 دقيقة بتوقيت غرينيتش، عن توقع تساقطات مطرية قوية رعدية مع احتمال تساقط البرد، إضافة إلى رياح عاصفية قوية محلياً فعدد من عمالات وأقاليم المملكة، بمستوى يقظة برتقالي.

وحسب النشرة، فالأمطار الرعدية غادي تهم ما بين 60 و90 ملم أقاليم شفشاون، تطوان، العرائش، الحسيمة وتازة، وما بين 40 و60 ملم فتاونات ووزان، بينما غادي تسجل ما بين 30 و40 ملم فالمضيق-الفنيدق، طنجة-أصيلة، مكناس، فاس، صفرو، القنيطرة، سيدي قاسم، بني ملال، الحاجب، إفران، خنيفرة، الخميسات وسيدي سليمان.

وغادي تبدا هاد الظاهرة من نهار الخميس 5 فبراير مع 12:00 حتى لنهار الجمعة 6 فبراير مع 23:00.

ومن جهة أخرى، نبّهات المديرية لحدوث رياح عاصفية قوية محلياً كتراوح السرعة ديالها بين 75 و85 كلم فالساعة، وغادي تهم ففترة أولى من 11:00 حتى 19:00 ديال الخميس أقاليم فحص-أنجرة، العرائش، طنجة-أصيلة، تطوان، المضيق-الفنيدق، تاونات، وزان، تازة، القنيطرة، بركان، الدريوش، فكيك، الناظور، وجدة-أنجاد، جرادة، ميدلت، سيدي بنور، أسا، الجديدة، بولمان، صفرو، الحسيمة، كرسيف، تاوريرت وشفشاون.

وففترة ثانية من 11:00 حتى 20:00 ديال الجمعة 6 فبراير، غادي تشمل الرياح أقاليم تاونات، الحوز، تطوان، المضيق-الفنيدق، طاطا، وزان، جرادة، الناظور، تزنيت، العرائش، طنجة-أصيلة، تازة، شفشاون، فحص-أنجرة، إفران، ميدلت، بولمان، صفرو، الحسيمة، كرسيف، وجدة-أنجاد، أزيلال، تاوريرت وتنيغير.