مرة أخرى كتلقى ساكنة عدد من أحياء مدينة طنجة راسها ضحية لقرارات مفاجئة ديال شركة “أمانديس”، اللي علنات على قطع الماء الصالح للشرب ابتداءً من البارح فالليل مع العشرة، بسبب أعطاب فشبكة التزويد ناتجة، حسب الشركة، عن انهيار أرضي ألحق ضرر بقنوات خزان السانية.

البلاغ اللي خرجات بيه الشركة كيهضر على انقطاع مؤقت غادي يستمر حتى الحادية عشر صباح اليوم الخميس، وغادي يشمل أحياء السانية، الهرارش، السانية العليا، الشجيرات، طريق مجمع البحرين، مالاباطا هيلز، السانية الوقاية، مركب باي بانوراميك، بيرلو وفندق أوكسييدنتال طنجة. ولكن بالنسبة للمواطنين، ماشي “انقطاع مؤقت”، بل حلقة جديدة فمسلسل المعاناة المتكرر مع شركة ما قدرتش توفر أبسط خدمة بشكل مستقر.

الساكنة عبرات عن غضبها من هاد الوضع، خصوصاً أن الإعلان جا فآخر لحظة، بلا ما يكون عند الناس وقت كافي باش يتزودو بالماء أو ياخدو احتياطاتهم، وهو الشي اللي كيطرح سؤال كبير حول طريقة تواصل الشركة مع المواطنين وحول احترامها لالتزاماتها التعاقدية.

وماشي هادي المرة الأولى اللي كتعرف فيها طنجة انقطاعات متكررة ديال الما، وفكل مرة كتخرج أمنديس بمبررات مختلفة: مرة أشغال، مرة أعطاب، ومرة انهيارات… ولكن الثابت الوحيد هو أن المواطن هو اللي كيخلّص الثمن، سواء من راحتو أو من جيبو من خلال فواتير مرتفعة مقابل خدمة مهزوزة.

هاد الأعطاب المتكررة كتبيّن بالملموس فشل الشركة فصيانة الشبكة وتحيين البنيات التحتية، وطالبات بتدخل عاجل من السلطات المختصة لفتح تحقيق فطريقة تدبير قطاع الماء بطنجة، ومحاسبة المسؤولين على هاد العبث اللي ولى كيهدد الاستقرار اليومي ديال الساكنة.

واش يعقل مدينة بحجم طنجة، قطب اقتصادي وسياحي كبير، تبقى رهينة لأعطاب متواصلة فالماء؟ وهل يعقل المواطن ينعس بلا ما ويصبح بلا ما؟ أسئلة كتطرح اليوم بقوة، وكتستنى جواب حقيقي ماشي غير بلاغات اعتذار مكررة.