شي حاجة ما راكباش. اللي خاصو يكون فالتيران راه الوزرا ماشي الولاة. التسويق المبالغ فيه لهاد المسؤولين كيضرب "الاختيار الديموقراطي" .

مصدر الصورة

كود هناء ابو علي ////

كاين هاد ليام ديال الشتا والريح والفيضانات تسويق كبير ومبالغ فيه لولاة الجهات المتضررة. محمد اليعقوبي والي جهة الرباط لقنيطرة زعير بقاو غير يديرو ليه برنامج فتلفزيون الواقع. تابعينو وحافظين شحال مشى واش لبس ……

ولاة جهات اخرى متضررة حتى هما محيحين. طبعا بلا ما ننساو العمال ورجال السلطة.

كاين تركيز كبير غير على رجال السلطة. المنتخب من الحكومة حتى المجالس البلدية والقروية غابرين. شفنا منتخب واحد حاضر ولكن دورو غير براح. وهو محمد السيمو رئيس المجلس البلدي للقصر لكبير. شفناه غير كيبرح فالمواطنين باش يخرجو. حددو ليه خدمتو فالتواصل مع المواطنين باش يخويو شي احياء مهددة بالفيضان فهاد لمدينة.

التيران. الخدمة ديال بصاح عند رجال السلطة. العبثي فهاد الشي ان كاع الاليات والوسائل التقنية والمادية تابعة للمنتخب. للجماعات المحلية.

فهاد الفيلم غايب المنتخب وغائب الوزير. اي الحكومة. حاضرة الداخلية اللي كتبان فوق هاد الحكومة واخا هي عضو فيها.

فسنة انتخابية يتعطى هاد القوة لرجالات السلطة راه غادي يكون عندو تأثير مباشر على الاصوات. للي بغاها الوالي والعامل والقايد والشيخ هو اللي يكون.

من المفروض فدولتنا اللي حسمات ف”الاختيار الديموقراطي” باش تشرف الحكومة بشكل مباشر على هاد العملية ديال الانقاذ ورجال السلطة ينقدو اش كيقولو المسؤولين والمنتخبين ماشي العكس.

هاد العام طانيت انتخابات غادي يخرج منها رئيس الحكومة والاغلبية. لمغاربة غاديين يصوتو عليهم باش يسيرو شؤونهم. يعني خاص يحاسبوهم هما. باش يتحاسبو خاصهم يخدمو ما يجيش رجال السلطة ويسوقوهم باللي هما للي خدامين.

الداخلية ورجالاتها اختصاصاتهم واضحة. خاص تبقى فهاد الحدود وخاص السياسي يتحمل مسؤوليتو. فهاد الوضعية اللي كنعرفوها خاص رئيس الحكومة والوزراء اللي قطاعاتهم معنية يكونو فالتيران ماشي غير الولاة والعمال والقياد